Surxondaryo viloyati Sariosiyo tumani hokimligi

Hududlarga tashrif – G.Xidirov hududi

Mamlakatimizda tadbirkorlikni rivojlantirish, eksport salohiyatini oshirish va mahsulot yetishtiruvchi hamda eksport qiluvchi subyektlarni qo‘llab-quvvatlashga qaratilgan manzilli ishlar izchil amalga oshirilmoqda.

Bugun, Sariosiyo tumani hokimi Odiljon Yaqubov oziq-ovqat xavfsizligini ta’minlash manbai bo‘lgan qishloq va suv xo‘jaligi sohasida olib borilayotgan agrotexnik tadbirlarni o‘z vaqtida, sifatli bajarilishini ta’minlash maqsadida tumanda meva-sabzavot yetishtiruvchi va eksport qiluvchi tadbirkorlik subyektlariga tashrif buyurdi.

Dastlab, tuman rahbari limon yetishtirish hamda ularni eksport qilish bilan shug‘ullanuvchi “Uz-Agro-Lider” MChJ faoliyatini ko‘zdan kechirib, amalga oshirilayotgan loyihalarning ijrosi va ishlab chiqarish hajmlarini oshirish borasidagi mavjud muammolar muhokama qilindi. Muammolarni bartaraf etish bo‘yicha aniq vazifalar mas’ullarga yuklatildi.

Shundan so‘ng, hududdagi “Xondamir Mirishkor” meva-sabzavotlarini tayyorlash va g‘amlash korxonasi faoliyati bilan tanishib, mas’ullarga tadbirkorlar va eksportyorlarni qo‘llab-quvvatlash, ular uchun qulay ishbilarmonlik muhitini yaratish yuzasidan tegishli ko‘rsatmalar berildi.

Hududlarga tashrif – Dashnobod hududi

Zamonaviy iqtisodiyot rivoji hududning tadbirkorlik muhiti, investitsiyaviy jozibadorligi va eksport salohiyatiga bog‘liq. Bu omillar aholi farovonligini oshirishda muhim ahamiyat kasb etadi.

Xususan, Sariosiyo tumani hokimi Odiljon Yaqubov hududlarga tashrifini davom ettirib, tumanning Dashnobod hududidagi ko‘p tarmoqli meva-sabzavot  yetishtirish hamda ularni eksport qilish bilan shug‘ullanuvchi “Abdug‘affor Abdurahmon Davr” MChJ hamda “Abdusalom Zayniddin” fermer xo‘jaligi  faoliyatlarini ko‘zdan kechirdi.

Tashrif davomida, tuman rahbari tomonidan issiqxona xo‘jaliklarini qo‘llab-quvvatlashga qaratilgan imtiyoz va imkoniyatlar, shuningdek, meva-sabzavot mahsulotlari yetishtirish hamda eksport hajmini oshirish bo‘yicha amalga oshiriladigan chora-tadbirlar muhokama qilindi.

Shu bilan birga, soha vakillarining taklif va mulohazalari tinglanib, sohani yanada rivojlantirish, yangi ish o‘rinlari yaratish va eksport salohiyatini oshirish, mavjud muammolarni bartaraf etish bo‘yicha aniq vazifalar belgilab olindi.