Korrupsiyaga qarshi kurashish hududiy Kengashi yig‘ilishi bo‘lib o‘tdi
2025-10-11 17:00:00 / Yangiliklar
Qarshi shahar hokimligida Qashqadaryo viloyati Korrupsiyaga qarshi kurashish hududiy Kengashi yig‘ilishi o‘tkazildi. Unda viloyat prokurorining o‘rinbosari S.B.Fayziyev, xalq deputatlari viloyat Kengashi kotibiyat mudiri R.P.Raupov hamda tegishli tashkilotlar mutasaddilari ishtirok etdi.
Yig‘ilishda davlatimiz rahbarining joriy yilning 5-mart kuni o‘tkazilgan Korrupsiyaga qarshi kurashish Milliy kengash yig‘ilishida berilgan topshiriqlari, shuningdek joriy yilning 14-may kuni tasdiqlangan Qashqadaryo viloyatida korrupsiyaning oldini olish, ayniqsa, maishiy korrupsiyaga barham berish maqsadida barcha soha va tarmoqlarni qamrab oluvchi “Yo‘l xaritasi” ijrosi yuzasidan viloyat ishchi guruhi tomonidan Qarshi shahrida o‘tkazilgan o‘rganish natijalari muhokama qilindi.
O‘rganishlar davomida qurilish, kadastr, sog‘liqni saqlash, kambag‘allikni qisqartirish va bandlik hamda ta’lim sohalarida ayrim qonunbuzilish va korrupsiya holatlari aniqlangani qayd etildi.
Yig‘ilish yakunida aniqlangan kamchiliklarni bartaraf etish hamda korrupsiyani oldini olish bo‘yicha aniq chora-tadbirlar belgilab olindi.