Qarshida “Ayollar daftari” tizimining 5 yillik sarhisobiga bag‘ishlangan anjuman bo‘lib o‘tdi
2025-07-18 18:50:00 / Yangiliklar
Qarshi shahrida “Iqtisodiy mustaqillikdan – ijtimoiy faollik sari” shiori ostida o‘tkazilgan anjumanda Oila va xotin-qizlar qo‘mitasi raisining birinchi o‘rinbosari Umida Abdullayeva, viloyat hokimining o‘rinbosari Ziyoda Aminova va boshqa mutasaddilar ishtirok etdi.
Anjuman davomida “Ayollar daftari” tizimi orqali 2020-2025 yillar oralig‘ida viloyatda amalga oshirilgan ishlar sarhisob qilinib, kelgusidagi vazifalar belgilandi.
Qayd etilishicha, 2020-2025 yillar davomida 412 ming 597 nafar xotin-qiz “Ayollar daftari”ga kiritilgan. Shundan 381 ming 968 nafar ayolga 390,4 mlrd so‘mlik yordam ko‘rsatilgan. 224 ming 235 nafar ehtiyojmand ayol ish bilan ta’minlangan. 14 ming 559 nafar ayolga 180,2 mlrd so‘mlik imtiyozli kredit ajratilgan.
Eng muhimi, ushbu tizim ayollarning iqtisodiy mustaqillikka erishishi, jamiyatdagi ijtimoiy faolligining ortishida muhim o‘rin tutayotgani ta’kidlandi.
Anjumanda jamiyatda o‘z o‘rnini topgan, “Ayollar daftari”dan chiqqan yetakchi ayollar tashakkurnoma va esdalik sovg‘alari bilan taqdirlandi.