Qarshida “Xavfsiz mahalla bilimdoni” ko‘rik-tanlovining shahar bosqichi o‘tkazildi
2026-10-20 15:45:00 / Yangiliklar
Qarshi shahrida mahallalarda jinoyatchilikning barvaqt oldini olish va huquqbuzarliklar profilaktikasini kuchaytirish maqsadida “Xavfsiz mahalla bilimdoni” intellektual ko‘rik-tanlovining shahar bosqichi bo‘lib o‘tdi.
Mazkur tanlov Qarshi shahar prokuraturasi, shahar ichki ishlar boshqarmasi hamda Mahallalar uyushmasi shahar bo‘limi hamkorligida tashkil etildi.
Bellashuvda “mahalla yettiligi” a’zolaridan tashkil topgan jamoalar ishtirok etib, jinoyatchilikning barvaqt oldini olish, huquqbuzarliklar profilaktikasi va ushbu yo‘nalishdagi qonunchilikka oid bilimlarini sinovdan o‘tkazdilar.
Tanlov yakuniga ko‘ra, “Zog‘za” mahallasi jamoasi uchinchi, “Geolog” mahallasi jamoasi ikkinchi o‘rinni egalladi. “Mahallot” mahallasi jamoasi esa barcha raqiblaridan ustun kelib, birinchi o‘rinni qo‘lga kiritdi hamda tanlovning viloyat bosqichida ishtirok etish huquqini beruvchi yo‘llanmaga sazovor bo‘ldi.
G‘olib jamoalarga diplomlar va esdalik sovg‘alari topshirildi.
Ta’kidlash joizki, bunday intellektual bellashuvlar “mahalla yettiligi” a’zolarining huquqiy bilimlarini oshirish, hamkorlikni mustahkamlash va mahallalarda jinoyatchilikning barvaqt oldini olish borasidagi mas’uliyatini yanada kuchaytirishga xizmat qiladi.