Qarshi shahar bo‘yicha Ichki ishlar organlari faoliyatini muvofiqlashtirish boshqarmasi boshlig‘i, polkovnik Ibragimov Farrux Farhodovichning shahar aholisiga M U R O J A A T I
2026-02-02 15:05:00 / Rahbariyatning bayonotlari va nutqlari
Qarshi shahar bo‘yicha Ichki ishlar organlari faoliyatini muvofiqlashtirish boshqarmasi boshlig‘i, polkovnik Ibragimov Farrux Farhodovichning shahar aholisiga
M U R O J A A T I
Qadrli hamshaharlar!
Hurmatli vohadoshlar!
Barchamizga yaxshi ma’lumki, keyingi yillarda muhtaram Prezidentimiz Shavkat Miromonovich Mirziyoyev rahbarligida mamlakatimizda inson qadrini ulug‘lash, uning huquq va manfaatlarini ta’minlash borasida ulkan ishlar amalga oshirilmoqda.
Bundan ko‘zlangan asosiy maqsad — ichki ishlar organlarini jamiyatimizda tinchlik va osoyishtalikni ta’minlash, jamoat tartibini saqlash yo‘lida sadoqat bilan xizmat qiladigan, xalqchil va professional tuzilmaga aylantirishdan iborat.
Bugungi kunda dunyo miqyosida axborot texnologiyalarining jadal rivojlanishi, XXI asrning axborot texnologiyalari asri sifatida e’tirof etilishi insonlar hayotini yengillashtirgani bilan birga, ularning shaxsiy ma’lumotlari va moliyaviy xavfsizligiga bo‘lgan tahdidlarning ham ortishiga sabab bo‘lmoqda. Elektron to‘lov tizimlari va plastik kartalardan foydalanish qulayligi oshgani sari, ushbu sohalarda sodir etilayotgan hujumlar soni ham ko‘paymoqda. Mazkur xavf-xatarlarning oldini olish esa kiberxavfsizlik orqali ta’minlanadi.
Ayni vaqtda kibermakonda sodir etilayotgan jinoyatlar soni sezilarli darajada oshib bormoqda. Ushbu jinoyatlarning o‘ziga xos jihati shundaki, ular masofadan turib sodir etiladi, jabrlanuvchi jinoyatni bevosita ko‘rmaydi va bunda inson hayotiga emas, balki uning shaxsiy va moliyaviy ma’lumotlariga tajovuz qilinadi. Shu bois, bunday jinoyatlarga qarshi kurashish samarali va zamonaviy yondashuvni talab etadi.
Qarshi shahrida yashovchi fuqarolardan kelib tushayotgan murojaatlar tahlil qilinganda, ayrim fuqarolarning Telegram ijtimoiy tarmog‘i orqali tarqatilayotgan “bu sening fotosuratlaring.apk” nomli zararli ilovani telefon qurilmalariga yuklab olishi oqibatida plastik kartalaridagi pul mablag‘lari yechib olinayotganligi aniqlanmoqda. Shuningdek, “uyda o‘tirib treyding orqali oson pul topishingiz mumkin” mazmunidagi yolg‘on va’da va reklamalarga ishonib, o‘z mablag‘larini firibgarlarga topshirib, aldangan holatlar ham uchramoqda.
Hurmatli hamshaharlar!
Jinoyatchilikning oldini olishda barchamiz birdek mas’ulmiz. Shu sababli, shahrimizni jinoyatchilikdan holi hududga aylantirishga o‘z hissangizni qo‘shishingizni, mol-mulkingizga befarq bo‘lmasligingizni, shaxsingizga oid ma’lumotlar hamda bank kartangiz rekvizitlarini begona shaxslarga bermasligingizni, uy-joy va avtomashina oldi-sotdisida hushyor bo‘lishingizni, farzandlaringiz tarbiyasiga e’tiborli bo‘lishingizni so‘rab qolaman.
Har qanday jinoyat va huquqbuzarlik holatlarida zudlik bilan hududiy profilaktika inspektoriga yoki viloyat Ichki ishlar boshqarmasining qisqa «102» va «112» raqamlariga murojaat qilishingizni tavsiya etaman.
Fuqarolarning haq-huquqlarini himoya qilish, qonun ustuvorligini ta’minlash hamda jamoat tartibini saqlash ichki ishlar organlari xodimlarining sharafli burchidir. Xalq manfaatlariga xizmat qilish soha vakillarining asosiy shiori bo‘lib qoladi.
Qadrli vatandoshlar, mamlakatimizda tinch va osoyishta hayotni yanada mustahkamlash, mahallalarimizda huquqbuzarlik va jinoyatchilikning oldini olish yo‘lida yagona kuch bo‘lib, hamjihatlikda harakat qilaylik!