Qarshi shahri hokimligi

Sessiyada shahar Kengashi deputatlari, viloyat hokimining birinchi o‘rinbosari Alisher Qodirov, shahar hokimi o‘rinbosarlari, shahar tashkilotlari, jamoat tashkilotlari hamda ommaviy axborot vositalari vakillari ishtirok etdi. Sessiyani shahar hokimi Normo‘min Xolboyev olib bordi.

Kun tartibida Qarshi shahrining 2026-yilgi mahalliy byudjetini tasdiqlash masalasi ko‘rib chiqildi. Bu borada shahar hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Nurbek Turdiyev axborot berdi.

Shuningdek, sessiyada Xalq deputatlari Qarshi shahar Kengashi raisini saylash masalasi ham muhokama qilindi.

Yangi tahrirdagi O‘zbekiston Respublikasi Konstitutsiyasining 120-moddasida Xalq deputatlari Kengashiga uning deputatlari orasidan saylangan rais boshchilik qilishi belgilangan. Shuningdek, viloyat, tuman va shahar hokimi bir vaqtning o‘zida Kengash raisi bo‘lishi mumkin emasligi qat’iy ko‘rsatib qo‘yilgan.

Konstitutsiyaning o‘tish qoidalariga muvofiq, 2024-yilda ilk marotaba Xalq deputatlari viloyatlar va Toshkent shahar Kengashlarining birinchi tashkiliy sessiyalarida deputatlar orasidan Kengash raislari saylab olingan edi. Ushbu amaliyot 2026-yil 1-yanvardan boshlab barcha tuman va shahar Kengashlariga tatbiq etilishi belgilangan.

Qonunchilikka ko‘ra, Xalq deputatlari Qarshi shahar Kengashi raisi lavozimiga nomzodlarni tavsiya etish uchun siyosiy partiyalar vakillari guruhi tashkil etildi. Tavsiya etilgan nomzodlar bo‘yicha ovoz berish natijasida, Xalq deputatlari Qarshi shahar Kengashi raisligiga shahar deputatlari orasidan 16-Mustaqillik saylov okrugidan deputat Xalimov Murodullo Ziyodullayevich saylandi.