Qarshi shahri hokimligi

Prezidentimiz rahbarligida Qarshi shahrini kompleks rivojlantirish, uni zamonaviy sanoat, madaniyat va turizm markaziga aylantirish borasida keng ko‘lamli islohotlar amalga oshirilmoqda. Hududga jalb etilayotgan xorijiy investitsiyalar, yangi ish o‘rinlari yaratilishi hamda infratuzilmaning tubdan yangilanishi shaharning iqtisodiy salohiyatini yanada oshirishga xizmat qilmoqda.

Davlatimiz rahbari topshiriqlariga asosan, respublikamizning 30 nafar shahar hokimlari Qashqadaryo viloyatiga tashrif buyurib, Qarshi shahrida amalga oshirilayotgan islohotlar va ilg‘or tajriba bilan yaqindan tanishdilar.

Tashrif doirasida mehmonlar hududlarni ijtimoiy-iqtisodiy jihatdan kompleks rivojlantirish, aholi turmush sifatini yaxshilash, zamonaviy infratuzilmani shakllantirish bo‘yicha amalga oshirilayotgan ishlar, shuningdek, investitsiya, qurilish, ta’lim, sog‘liqni saqlash, bandlik va madaniyat sohalarida erishilayotgan natijalar bilan tanishdilar.

Dastlab mehmonlar Qarshi tumanida joylashgan Abu Muin Nasafiy tarixiy majmuasiga tashrif buyurib, moturidiya ta’limotining yirik namoyandalaridan biri, ulug‘ alloma Abu Muin Nasafiy qadamjosini ziyorat qildilar. Bu yerda tashkil etilgan muzey faoliyati hamda allomaning boy ma’naviy merosi haqida ma’lumotlar berildi.

Shundan so‘ng delegatsiya Qarshi shahrida faoliyat yuritayotgan “ALP TEXNO SERVIS ” korxonasining televizor ishlab chiqarish loyihasi bilan tanishdi. Qiymati 8 million AQSH dollariga teng bo‘lgan loyiha doirasida korxonaning yillik ishlab chiqarish quvvati 450 ming donani tashkil etadi. Joriy yilda 12 million dollarlik mahsulot eksport qilingan. Ishlab chiqarish quvvatlari, texnologik liniyalar va mahsulot sifati mehmonlarda katta qiziqish uyg‘otdi.

Mehmonlar shuningdek, un mahsulotlari hamda o‘simlik yog‘i ishlab chiqarishga ixtisoslashgan “Asian Golden Oil” MCHJ ko‘p tarmoqli zamonaviy korxonasida bo‘lib, ishlab chiqarish jarayonlari, mavjud quvvatlar va kelgusidagi rejalar bilan tanishdilar.

Qarshi shahrida “Sulton Golden House” MCHJ tomonidan amalga oshirilayotgan umumiy qiymati 19,2 million AQSH dollari bo‘lgan turar joy majmuasi loyihasi ham ko‘zdan kechirildi. Loyiha doirasida 800 ta xonadonga mo‘ljallangan ko‘p qavatli turar joy binolari, ko‘ngilochar dam olish maskani hamda yer osti avtoturargohi barpo etilmoqda.

Shuningdek, mehmonlar Qarshi shahri kasbiy ko‘nikmalar markazi faoliyati bilan tanishdilar. Markazda 32 ta yo‘nalish bo‘yicha o‘quv kurslari tashkil etilgan bo‘lib, yiliga 2 790 nafar fuqaroni kasbga tayyorlash imkoniyati mavjud.

Delegatsiya Qarshi davlat universitetiga ham tashrif buyurib, zamonaviy Yoshlar markazi, yangi o‘quv binolari, xorijiy tillar o‘qitish uchun yaratilgan sharoitlar, sinxron tarjima markazi, lingofon xonalari, ma’ruza zallari hamda media markaz faoliyati bilan tanishdi.

Shu bilan birga, “Qatag‘on qurbonlari” muzeyi, “Roguzar” mahallasi yettiligi faoliyati hamda Qarshi shahar 3-oilaviy poliklinikasida raqamlashtirish sohasida amalga oshirilgan yutuqlar, aholiga ko‘rsatilayotgan zamonaviy tibbiy xizmatlar bilan tanishildi.

Tashrif davomida Qarshi shahrida amalga oshirilayotgan islohotlar va kompleks rivojlanish tajribasi yuqori baholandi.