"Umrim mehnatda oʻtdi, nega pensiyam kam?", "Hamkasbim bilan birga ishlaganmiz, nega uning pensiyasi koʻproq?" kabi savollar fuqarolarda koʻp uchraydi.

Chunki pensiya miqdori faqat necha yil ishlaganingizga bogʻliq emas. Uni belgilashda:

rasmiy ish staji;

rasmiy hisoblangan ish haqi;

pensiya hisoblash uchun tanlangan ish haqi davri;

qonunchilikda belgilangan imtiyoz va ustamalar;

axborot tizimlaridagi maʼlumotlar muhim ahamiyatga ega.

Amalda pensiya hisoblashda soʻnggi 10 yillik mehnat faoliyati davomidagi eng yuqori ish haqi olingan ketma-ket 5 yillik davr inobatga olinadi

Shu sababli bir joyda va bir xil lavozimda ishlagan ikki fuqaroning pensiya miqdori turlicha boʻlishi mumkin.

Eng muhimi, kelajakdagi pensiya pensiya yoshiga yetganda emas, mehnat faoliyati davomida shakllanadi. Norasmiy ishlash, ish haqining bir qismini "konvertda" olish yoki mehnat staji haqidagi maʼlumotlarni tekshirmaslik keyinchalik pensiya miqdoriga taʼsir qilishi mumkin.

Shuning uchun my.gov.uz portali orqali raqamlashtirilgan mehnat stajingiz, rasmiy ish haqingiz va jamgʻarib boriladigan pensiya tizimiga oʻtkazilgan badallarni muntazam tekshirib boring.

Ertangi pensiyangiz uchun bugundan harakat qiling!