O‘zbekiston Respublikasi Iqtisodiyot va moliya vazirligi huzuridagi budjetdan tashqari Pensiya jamg‘armasi

Budjetdan tashqari Pensiya jamgʻarmasi hamda Sankt-Peterburg davlat universitetining Toshkent shahridagi filiali oʻrtasida hamkorlik memorandumi imzolandi.

Memorandumning asosiy maqsadi — taʼlim va amaliyot oʻrtasidagi hamkorlikni yanada mustahkamlash, talabalarning ishlab chiqarish amaliyotini samarali tashkil etish, ularning nazariy bilimlarini amaliy koʻnikmalar bilan boyitish hamda pensiya taʼminoti sohasida amaliy tajriba orttirish uchun keng imkoniyatlar yaratishdan iborat.

Uchrashuv davomida talabalarni Pensiya jamgʻarmasi faoliyatiga keng jalb etish, qoʻshma ilmiy-amaliy loyihalarni amalga oshirish, innovatsion tashabbuslarni qoʻllab-quvvatlash hamda yuqori malakali kadrlar tayyorlash masalalari muhokama qilindi.

Mazkur hamkorlik taʼlim va amaliyot integratsiyasini yanada kuchaytirish, yosh mutaxassislarning kasbiy salohiyatini oshirish hamda pensiya taʼminoti tizimi uchun raqobatbardosh kadrlar tayyorlashga yordam beradi.

Shuningdek, ushbu memorandum ikki tomonlama hamkorlikni yangi bosqichga olib chiqish va kelgusida qoʻshma loyihalarni amalga oshirish uchun mustahkam asos boʻlib xizmat qiladi.