O‘zbekiston Bosh vaziri Urumchi shahrida Shinjon-Uyg‘ur avtonom rayoni Partqo‘mi kotibi bilan uchrashdi

Mazkur EKSPOda faxriy mehmon sifatida Qirg‘iziston Bosh vaziri, Qozog‘iston Bosh vazirining o‘rinbosari, shuningdek, 40 dan ortiq xorijiy hukumatlar vakillari ishtirok etishi kutilmoqda.

O‘zbekiston Respublikasi Prezidenti Shavkat Mirziyoyevning topshiriqlariga asosan, Bosh vazir boshchiligidagi mamlakatimiz hukumati delegatsiyasi mazkur tadbirda qatnashish uchun Urumchi shahriga tashrif buyurdi.

Bugun, 25-iyun kuni Urumchi shahriga tashrif doirasida O‘zbekiston Respublikasi Bosh vaziri Abdulla Aripov va Xitoy Kommunistik partiyasi Markaziy qo‘mitasi Siyosiy byurosi a’zosi, Shinjon-Uyg‘ur avtonom rayoni Partqo‘mi kotibi Ma Sinjuy boshchiligida ikki tomonlama uchrashuv o‘tkazildi.

Uchrashuvda O‘zbekiston va Xitoy o‘rtasidagi do‘stona hamda ko‘p qirrali sheriklik munosabatlari yuqori darajada rivojlanib borayotgani, bunda O‘zbekiston Respublikasi Prezidenti Shavkat Mirziyoyev va Xitoy Xalq Respublikasi Raisi Si Szinpin o‘rtasidagi yaqin, samimiy va birodarlik rishtalari muhim ahamiyat kasb etayotgani ta’kidlandi.

Ayniqsa, joriy yilning 6-iyun kuni Pekin shahrida “Xitoy-Qirg‘iziston-O‘zbekiston” temir yo‘li qurilishini amalga oshirish to‘g‘risidagi Hukumatlararo bitimning imzolanishi va bu marosimda davlatlarimiz rahbarlarining video-murojaat bilan ishtirok etishgani chinakam tarixiy voqea bo‘ldi.

Qayd etilganidek, hududlararo hamkorlikni yanada rivojlantirish, Shinjon va O‘zbekiston o‘rtasidagi tovar ayirboshlash hajmini keskin oshirish ikki tomonlama munosabatlarda muhim ahamiyat kasb etadi.

Shu maqsadda, Shinjonning yetakchi kompaniyalarini energetika, foydali qazilmalarni chuquq qayta ishlash, mashinasozlik, kimyo sanoati, farmatsevtika, qishloq xo‘jaligi va qurilish materiallari ishlab chiqarish sohalaridagi loyihalarni O‘zbekistonda amalga oshirish taklif etildi.

Shuningdek, madaniy-gumanitar, ilm-fan, ta’lim, turizm va boshqa sohalarda hamkorlikni chuqurlashtirish yuzasidan ham o‘zaro fikr almashildi.