Kambag‘allikni qisqartirish va bandlik vazirligi faoliyatining 9 oylik natijalari yuzasidan matbuot anjumani
2026-10-28 09:00:00 / Matbuot anjumanlari
Kambag‘allik darajasi 3,6 foizgacha pasaydi
O‘zbekiston Respublikasi Prezidenti Administratsiyasi huzuridagi OAV uchun kontent tayyorlash markazida Kambag‘allikni qisqartirish va bandlik vazirligining to‘qqiz oylik faoliyati yakunlariga bag‘ishlangan matbuot anjumani bo‘lib o‘tdi. Unda vazirning birinchi o‘rinbosari Marat Jurayev asosiy natijalarni taqdim etdi.
Hisobot davrida kambag‘allik darajasi 5,8 foizdan 3,6 foizgacha pasaydi. Kambag‘allikdan xoli mahallalar soni 1 435 tadan 3 627 taga yetdi. “Ijtimoiy reyestr”dagi 429 mingta oilaga daromadini oshirishga qaratilgan 581 mingta xizmat ko‘rsatildi, daromadi oshgan 440 mingta oila reyestrdan chiqarildi.
Bandlik va kasbga o‘qitish
To‘qqiz oy davomida 824 ming nafar fuqaro doimiy ishga joylashtirildi, 4 million 141 ming nafar aholining daromadini oshirishga ko‘maklashildi va 980 ming nafar fuqaroning norasmiy bandligi rasmiylashtirildi.
Kasbga o‘qitishga 96,4 ming kishi jalb qilindi. O‘qishni tamomlagan 59,2 ming nafar bitiruvchidan qariyb 45 mingi ish bilan ta’minlandi. Vaucher tizimi orqali qariyb 130 ming kishiga vaucher ajratilib, 95 mingdan ortig‘i o‘qishga jalb qilindi. O‘qishni tamomlagan 56,5 ming kishidan 43 mingdan ortig‘i ish bilan ta’minlandi.
Shuningdek, 23 ta kasb va lavozimni qamrab olgan 7 ta kasbiy standart hamda 2026–2030-yillarga mo‘ljallangan Munosib mehnat bo‘yicha mamlakat dasturi, kelajak kasblari atlasi, “yashil” bandlikni baholash metodologiyasi va mehnat bozorining milliy indikatorlar tizimi ishlab chiqildi.
Xodimlar huquqlarini himoya qilish
Davlat mehnat inspeksiyasi tomonidan 15,1 mingta nazorat tadbiri o‘tkazilib, 36,1 mingta qonunbuzilish holati aniqlandi. Qonunbuzilishlarni bartaraf etish yuzasidan 5 666 ta yozma ko‘rsatma va 247 ta taqdimnoma kiritilib, mansabdor shaxslarga 22,3 milliard so‘m ma’muriy jarima qo‘llanildi.
Inspeksiya aralashuvi bilan qariyb 35 ming nafar xodimga 832,1 milliard so‘mdan ortiq ish haqi undirib berildi, 4 467 fuqaroning mehnat huquqlari tiklandi. Ish haqi bo‘yicha sudlarga kiritilgan da’volar asosida qariyb 29,5 milliard so‘m undirildi. Ishga tiklash bo‘yicha sud qarorlari asosida 158 nafar fuqaro ishga tiklandi.
Mehnat xavfsizligi va majburiy mehnat
Mehnat faoliyati bilan bog‘liq 692 ta baxtsiz hodisa maxsus tekshirildi. Oqibatda 758 nafar fuqaro jabrlangan, jumladan, 205 nafari vafot etgan. Sud qarorlari asosida 16 milliard so‘mdan ortiq tovon puli undirildi.
Majburiy mehnatga oid 47 ta holat aniqlanib, aybdor mansabdor shaxslarga 1,5 milliard so‘m jarima qo‘llanildi.
Murojaatlar, raqamlashtirish va xalqaro hamkorlik
Joriy yilning to‘qqiz oyida vazirlik va uning tizim tashkilotlariga 63 315 ta murojaat kelib tushdi. Bu o‘tgan yilning shu davriga nisbatan 24 756 taga (28 %) kamaygan. Murojaatlarning 45 143 tasi (71 foizi) qanoatlantirildi, 17 791 tasi (28 foizi) huquqiy tushuntirish orqali hal etildi.
“Onlayn mahalla” elektron platformasi orqali 7 730 ta subsidiya va 8 835 ta ssuda arizasi bo‘yicha ijobiy qaror qabul qilindi. Natijada 64,1 milliard so‘m subsidiya va 79,8 milliard so‘m ssuda ajratildi. Bu o‘tgan yilga nisbatan subsidiyalarda 58,4 foiz, ssudalarda esa 31,4 foiz o‘sishni ko‘rsatadi.
Vazirlik Xalqaro mehnat tashkiloti, Jahon banki, BMT Taraqqiyot dasturi, Osiyo taraqqiyot banki, Shveytsariya Taraqqiyot va hamkorlik agentligi, Turkiya Hamkorlik va muvofiqlashtirish agentligi (TIKA) hamda Germaniya xalqaro hamkorlik tashkiloti bilan hamkorlikni kengaytirdi.
Kasbiy malakalarni xalqaro standartlar asosida baholash, sun’iy intellekt yordamida kasbga yo‘naltirish, “yashil” iqtisodiyot uchun mutaxassislar tayyorlash va ijtimoiy sug‘urta tizimini rivojlantirish bo‘yicha kelishuvlarga erishildi.
Mazkur tashabbuslar doirasida xotin-qizlar tadbirkorligini qo‘llab-quvvatlash, munosib ish o‘rinlarini yaratish, mehnat huquqlarini himoya qilish va gender tengligini ta’minlashga qaratilgan 14 ta istiqbolli loyihaga grantlar va texnik ko‘mak ajratildi.