Vazirlikda kitobxonlik madaniyatini rivojlantirishga qaratilgan yangi tashabbuslar amalga oshirilmoqda
2026-09-28 14:00:00 / Vazirlik yangiliklari
Kambag‘allikni qisqartirish va bandlik vazirligida xodimlar o‘rtasida kitobxonlik madaniyatini rivojlantirish, mutolaani keng targ‘ib qilish hamda bilim va kasbiy salohiyatni oshirishga qaratilgan tizimli ishlar amalga oshirilmoqda.
Mazkur yo‘nalishda vazirlik binosining birinchi qavatida kutubxona — kitob burchagi tashkil etildi. Xodimlarning bo‘sh vaqtlaridan unumli foydalanishi, turli yo‘nalishlardagi adabiyotlardan muntazam foydalanishi uchun zarur sharoitlar yaratildi.
Shuningdek, “Mutolaa” loyihasi bilan hamkorlik yo‘lga qo‘yilib, xodimlarning kitob o‘qishga bo‘lgan qiziqishini oshirish va mutolaa faolligini rag‘batlantirishga qaratilgan tizim joriy etildi.
Ushbu tizim doirasida xodimlarning kitobxonlik faolligi asosida reyting shakllantirib borilmoqda. Faol ishtirok etgan va yuqori natija qayd etgan xodimlarni e’tirof etish orqali jamoada mutolaa muhitini yanada mustahkamlash ko‘zda tutilgan.
Mazkur tashabbuslar vazirlik xodimlari o‘rtasida kitobxonlikni ommalashtirish, doimiy o‘rganish va o‘z ustida ishlash madaniyatini rivojlantirishga xizmat qiladi.
Vazirlikda kitobxonlik yo‘nalishida amalga oshirilayotgan ishlar hamda reyting natijalari to‘g‘risidagi ma’lumotlar rasmiy veb-sayt va ijtimoiy tarmoqlardagi sahifalarda muntazam yoritib boriladi.