2026-yil 16-sentabr kuni O‘zbekiston Respublikasi Kambag‘allikni qisqartirish va bandlik vaziri Botir Zohidov Xalqaro mehnat tashkiloti (XMT) tomonidan tashkil etilgan Ijtimoiy adolat bo‘yicha Global koalitsiyaning Yillik forumida ishtirok etdi.

Vazir "Koalitsiya hamkorlari amalda: asosiy tashabbuslar orqali natijalarga erishish" mavzusidagi panel muhokamasida so‘zga chiqdi. Unda hukumatlar, xalqaro tashkilotlar, ish beruvchilar va xodimlar vakillari ishtirok etdi.

O‘z nutqida Botir Zohidov O‘zbekiston uchun ijtimoiy adolat iqtisodiy islohotlar, bandlik siyosati, kambag‘allikni qisqartirish va inson kapitalini rivojlantirish jarayonlariga izchil singdirilayotgan tamoyil ekanini ta’kidladi.

"O‘zbekiston uchun ijtimoiy adolat — iqtisodiy islohotlar, bandlik siyosati, kambag‘allikni qisqartirish va inson kapitalini rivojlantirishga singdirilgan tamoyildir", — dedi vazir.

Amalga oshirilayotgan islohotlar natijalariga to‘xtalar ekan, u mamlakatda kambag‘allik darajasi 3,9 foizgacha, ishsizlik darajasi esa 4,5 foizgacha pasayganini qayd etdi. 2025-yilda 5,4 million kishi daromadli mehnat bilan ta’minlandi. Vazirning ta’kidlashicha, Jahon banki O‘zbekistondagi iqtisodiy o‘sish tengsizlikning kamayishi bilan birga kechayotganini qayd etmoqda.

Vazirning so‘zlariga ko‘ra, asosiy vazifa nafaqat insonni kambag‘allikdan chiqarish, balki uning yana kambag‘allikka qaytishining oldini oladigan barqaror sharoitlarni yaratishdan iborat. Shu bois O‘zbekistonda bandlik siyosati, kasbiy ko‘nikmalarni rivojlantirish, tadbirkorlikni qo‘llab-quvvatlash va ijtimoiy himoya kambag‘allikni qisqartirishga qaratilgan yagona yondashuv doirasida birlashtirilmoqda.

Aniq misol sifatida vazir 2025-yilda 40 ming nafar yosh elektron tijorat sohasida ko‘nikmalarga ega bo‘lganini qayd etdi. Shu bilan birga, kasbiy tayyorgarlik tizimi tobora mehnat bozorining real ehtiyojlariga yo‘naltirilmoqda. Shuningdek, ijtimoiy xizmatlarni manzilli taqdim etish rivojlantirilmoqda hamda Jahon banki ko‘magida ijtimoiy, iqtisodiy va iqlim xatarlariga yanada samarali javob bera oladigan moslashuvchan ijtimoiy himoya tizimi shakllantirilmoqda.

Nutq davomida yashil va raqamli transformatsiyaga ham alohida e’tibor qaratildi. Vazir texnologik transformatsiya nafaqat yangi texnologiyalarning paydo bo‘lishi, balki yangi ish o‘rinlari, kasblar va ko‘nikmalarga bo‘lgan talabni ham shakllantirishini ta’kidladi. Shu munosabat bilan mehnat bozoridagi kelajakdagi o‘zgarishlarni hisobga olgan holda kadrlarni tayyorlash va qayta tayyorlash alohida ahamiyat kasb etadi.

Botir Zohidov milliy islohotlarni jadallashtirishda xalqaro hamkorlikning muhimligini ham qayd etdi. O‘zbekiston adolatli o‘tishlar uchun bandlik va ijtimoiy himoya bo‘yicha Global akselerator tashabbusida birinchilardan bo‘lib qatnashgan davlatlardan biri hisoblanadi. Ushbu tashabbus doirasidagi Milliy yo‘l xaritasi norasmiy bandlikni qisqartirish, inklyuziv ijtimoiy himoyani rivojlantirish, shuningdek, adolatli yashil va raqamli o‘tishlarni ta’minlash masalalarini qamrab oladi.

2026-yil iyun oyida O‘zbekiston Kambodja bilan hamkorlikda Global akselerator bo‘yicha yuqori darajadagi vazirlar uchrashuvini o‘tkazdi. Bundan tashqari, mamlakat Ijtimoiy adolat bo‘yicha Global koalitsiya, Alliance 8.7 va Jahon bankining "Jobs for the Poor" tashabbusida faol ishtirok etmoqda. Vazirning so‘zlariga ko‘ra, ushbu hamkorliklar xalqaro majburiyatlarni milliy darajadagi aniq natijalarga aylantirish imkonini bermoqda.

"Ijtimoiy adolat iqtisodiy transformatsiya jarayonining boshidanoq uning ajralmas qismiga aylanishi kerak. Faqat shundagina iqtisodiy o‘sish barcha uchun real imkoniyatlar yaratishi mumkin", — deya ta’kidladi Botir Zohidov o‘z nutqi yakunida.

O‘zbekiston Respublikasi Prezidentining ish jadvali o‘zgarishi hamda vazirning Qoraqalpog‘istonga ishchi tashrif bilan borishi zarurligi munosabati bilan Botir Zohidov Forumdagi ishtirokini shaxsan davom ettira olmasligini ma’lum qildi va O‘zbekistonning Forumdagi keyingi ishtirokini vazir o‘rinbosari Rano Turdiboyeva davom ettirishini ma’lum qildi.