PRESS-RELIZ

2026-yil 10-sentabr kuni Toshkent shahrida “Ijtimoiy va reabilitatsiya xizmatlarini rivojlantirish, nogironligi bo‘lgan shaxslarni qo‘llab-quvvatlash” mavzusida xalqaro konferensiya bo‘lib o‘tadi.

Mazkur tadbir O‘zbekiston Respublikasi Kambag‘allikni qisqartirish va bandlik vazirligi, Sog‘liqni saqlash vazirligi  hamda O‘zbekiston Respublikasi Prezidenti huzuridagi Ijtimoiy himoya milliy agentligi tomonidan Mustaqil Davlatlar Hamdo‘stligiga a’zo davlatlarning Mehnat, bandlik va aholini ijtimoiy himoya qilish bo‘yicha maslahat kengashi ko‘magida tashkil etilmoqda.

Konferensiya MDH davlatlari o‘rtasida ijtimoiy ta’minot, reabilitatsiya xizmatlarini rivojlantirish hamda nogironligi bo‘lgan shaxslarni qo‘llab-quvvatlash sohasidagi hamkorlikni yanada mustahkamlash, ularning mehnat bozoridagi ishtirokini kengaytirish, bandligini ta’minlash va munosib mehnat sharoitlarini yaratish bo‘yicha xalqaro tajribani o‘rganishga qaratilgan.

Tadbirda O‘zbekiston, Ozarbayjon, Belarus, Qozog‘iston, Qirg‘iziston,  Turkmaniston va Rossiya Federatsiyasining tegishli vazirlik va idoralari vakillari, shuningdek, MDH Ijroiya qo‘mitasi, soha ekspertlari va mutaxassislari ishtirok etadi. 

Konferensiya sessiyalarida nogironligi bo‘lgan shaxslarni reabilitatsiya va abilitatsiya qilishning zamonaviy tizimlari, ijtimoiy xizmatlarni rivojlantirish, nogironlikni belgilashning yangi yondashuvlari hamda nogironligi bo‘lgan fuqarolarni ochiq mehnat bozoriga integratsiya qilish masalalari muhokama qilinadi.

Yalpi majlis va sessiyalar doirasida kompleks reabilitatsiyaning jahon va milliy tendensiyalari, tibbiy va ijtimoiy xizmatlarni takomillashtirish, MDH davlatlari bilan ijtimoiy sohadagi hamkorlikning istiqbolli yo‘nalishlari ko‘rib chiqiladi. Shuningdek, ilg‘or xalqaro tajriba almashilib, nogironligi bo‘lgan shaxslarni reabilitatsiya qilish hamda ularga ko‘rsatiladigan xizmatlar samaradorligini oshirishga qaratilgan amaliy yondashuvlar taqdim etiladi.

Tadbir yakunida ishtirokchilar tomonidan Konferensiya rezolyutsiyasini qabul qilish masalasi ko‘rib chiqiladi. Shuningdek, 11-sentabr kuni konferensiya ishtirokchilari O‘zbekistonda reabilitatsiya xizmatlarini ko‘rsatish bo‘yicha amalga oshirilayotgan ishlar bilan yaqindan tanishadi.  

Batafsil