O‘zbekiston Respublikasi Kambag‘allikni qisqartirish va bandlik vazirligi

Bugungi brifingda vazirlik tomonidan 2026 yilning birinchi yarim yilligida fuqarolar va yuridik shaxslar murojaatlari bilan ishlash borasida amalga oshirilgan ishlar, erishilgan natijalar hamda kelgusi rejalar haqida ma'lumot beramiz.

Fuqarolar murojaati davlat organlari faoliyati samaradorligini baholovchi muhim mezon hisoblanadi. Shu bois mamlakatimizda har bir murojaat qonunchilik talablari asosida, xolis va adolatli ko'rib chiqilishi ta'minlanmoqda.

Joriy yilning shu davriga qadar Kambag'allikni qisqartirish va bandlik vazirligi hamda uning tizimiga 54 mingdan ortiq murojaat kelib tushdi. Bu o'tgan yilning mos davriga nisbatan 8 foizga kamdir. Murojaatlarning asosiy qismi elektron shaklda qabul qilingan bo'lib, Prezidentning Xalq qabulxonalari, Virtual qabulxonasi, Bosh prokuratura, Kasaba uyushmalari federatsiyasi, vazirlikning ishonch telefoni va boshqa manbalar orqali kelib tushgan.

Mazkur murojaatlarning 71,2 foizi ijobiy hal etildi, qolganlariga esa amaldagi qonunchilik asosida huquqiy tushuntirishlar berish orqali yechim topildi.

Tahlillardan shuni ko'rish mumkinki, murojaatlarning asosiy qismi mehnat huquqlari, aholini ish bilan ta'minlash hamda tadbirkorlikni qo'llab-quvvatlash masalalariga to'g'ri kelmoqda. Shuningdek, ularni ichida elektron mehnat daftarchasi, kasb-hunarga o'qitish, tomorqa yer va dehqon xo'jaliklari bilan bog'liq murojaatlar ham mavjud.

Bugungi kunda Prezident topshiriqlari ijrosini ta'minlash maqsadida vazirlikda murojaatlar bilan ishlash tizimi yanada takomillashtirildi. Maxsus shtablar tashkil etilib, avval huquqiy tushuntirish bilan yakunlangan murojaatlar qayta ko'rib chiqildi va minglab fuqarolar masalalari ijobiy hal etildi. Shuningdek, Qarshi shahri tajribasi asosida manzilli ishlash mexanizmi joriy etildi. Unga ko'ra, 100 dan ortiq tizimli muammo aniqlanib, ularni bartaraf etish bo'yicha choralar belgilandi.

Murojaatlar bilan ishlash sifatini oshirish maqsadida tizimda nazorat kuchaytirildi, hududlarda xizmat tekshiruvlari o'tkazildi hamda mas'ul xodimlarga nisbatan intizomiy choralar ko'rildi.

6 oy davomida 80 dan ortiq sayyor qabul o'tkazilib, ularda 3 mingdan ortiq fuqarolarning muammolari ko'rib chiqildi.

Fuqarolarga qulaylik yaratish, murojaatlarni tezkor qabul qilish hamda mehnat huquqlari bo'yicha aholining huquqiy xabardorligini oshirish maqsadida "munosibmehnat_bot" elektron muloqot platformasi ishga tushirildi.

Shuningdek, vazirlik Axborot xizmati bilan tezkor muloqot qilish uchun mo'ljallangan @BV_press_bot orqali fuqarolar vazirlik faoliyati, media loyihalari, axborot siyosatiga oid fikr-mulohazalari va murojaatlarini yuborishlari mumkin. Ijtimoiy tarmoqlar orqali kelib tushayotgan so'rov va murojaatlarni avtomatik monitoring qilish va tezkor javob berish maqsadida Community Manager funksiyasi samarali ishlab turgani ham o'zining ijobiy natijalarini ko'rsatmoqda.

Bundan tashqari, vazirlik tizimida korrupsiyaviy huquqbuzarliklar to'g'risidagi xabarlarni tezkor qabul qilishga qaratilgan (71) 203-01-22 ishonch telefoni ham ishlab turibdi.

Bugungi kunda sun'iy intellekt texnologiyalari davlat xizmatlari samaradorligini oshirishda muhim ahamiyat kasb etmoqda. Kambag'allikni qisqartirish va bandlik vazirligi tizimida ham ushbu jarayonlar o'z natijasini ko'rsatmoqda.

Xususan, aholi bandligini ta'minlash jarayonlarini raqamlashtirish doirasida ish beruvchilar va ish qidiruvchilar uchun qulaylik yaratgan Osonish.uz hamda Mening ishim platformalarining samarali faoliyati bunga misoldir.

Shu bilan birga, sun'iy intellekt texnologiyalari yordamida fuqarolarning savollariga 24/7 rejimida tez va oson javob berish tizimini yaratish bo'yicha ishlar tashkil etilmoqda.

Bu esa murojaatlarni ko'rib chiqish muddatlari va inson omili ta'sirini qisqartirib, aholiga yanada qulay xizmat ko'rsatish imkoniyatlarini taqdim etadi. Shuningdek, imkoniyati cheklangan shaxslar uchun javoblarni ovozli tarzda eshitish funksiyasini joriy etish ham rejalashtirilmoqda.

Bundan tashqari, vazirlikning call markaz xizmati faoliyatini yanada takomillashtirish, alternativ aloqa shaklini yo'lga qo'yish, shuningdek, fuqarolardan eng ko'p tushayotgan murojaatlar bo'yicha rasmiy tarmoqlar orqali jonli efir va ovozli chatlarni muntazam tashkil etish choralari ustida amaliy ishlar olib borilmoqda. Ayni damda ekranda chiqayotgan ushbu QR kod orqali chatga o'tib, bandlik vazirligi faoliyatiga doir aynan qaysi mavzu sizga qiziqligini yozib qoldirishingiz mumkin. Eng ko'p so'ralgan mavzu bo'yicha bir necha kun ichida jonli efir tashkil qilinadi.

Kambag'allikni qisqartirish va bandlik vazirligi tomonidan murojaatlarni o'z vaqtida, xolisona va sifatli ko'rib chiqish, aholi bilan ochiq muloqotni yanada takomillashtirish hamda raqamli texnologiyalar asosida murojaatlar bilan ishlash tizimini rivojlantirish bo'yicha ishlar izchil davom ettiriladi. Chunki har bir murojaat ortida inson taqdiri va uning qonuniy manfaatlari mujassam.

Bu borada fuqarolarning huquq va manfaatlarini ta'minlash, davlat organlari faoliyatining ochiqligi va samaradorligini yanada oshirish vazirlikning ustuvor vazifalaridan biri bo'lib qoladi.