2024-yilning birinchi yarim yilligida Kambag‘allikni qisqartirish va bandlik vazirligi tizimida “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid Davlat dasturining bajarilishi yuzasidan brifing
2024-08-15 14:55:00 / Vazirlik yangiliklari
Aytish kerakki, joriy yilgi Davlat dasturida Kambag‘allikni qisqartirish va bandlik vazirligiga ham qator vazifalar yuklatilgan.
Xususan, Farmon va Davlat dasturi bilan vazirlik zimmasiga jami 29 ta, shundan, asosiy ijrochi sifatida 14 ta va ham ijrochi sifatida 13 ta bandda topshiriqlar berilgan.
Joriy yilning 1-yarim yilligida vazirlik asosiy ijrochi sifatida belgilangan 6 ta band to‘liq bajarildi. Jumladan, aholini daromadli mehnat bilan band qilish, ijtimoiy sug‘urta tizimini takomillashtirish doirasida 2 ta me’yoriy-huquqiy hujjat loyihasi ishlab chiqildi.
Shu bilan birga, joriy yilning 6 oyida 4 ta amaliy chora-tadbirlar bajarildi. Xususan, xotin-qizlar tadbirkorligini qo‘llab-quvvatlash, xotin-qizlar tadbirkorlik markazlari faoliyatini takomillashtirish maqsadida hududlardagi 14 ta “Xotin-qizlar tadbirkorlik markazlari”da SMM, mobil grafika, IT, veb dizayner kabi zamonaviy kasblar bo‘yicha o‘qitish yo‘lga qo‘yildi.
Ushbu markazlarda joriy yilda 89 ming nafar xotin-qizni
kasb-hunarga va tadbirkorlikka, 50 ming nafar xotin-qizni IT yo‘nalishida o‘qitish bo‘yicha rejalar ishlab chiqildi.
Mazkur markazlarda 15 ta yo‘nalishda ikki oygacha bo‘lgan o‘quv kurslari tashkil etilib, 6 oyda jami 44 ming nafar ayollar kasb-hunarga o‘qitildi.
Oila va xotin-qizlarni qo‘llab-quvvatlash davlat maqsadli jamg‘armasi mablag‘lari hisobidan markazlarning o‘qitish faoliyati bilan bog‘liq 3,8 mlrd so‘mlik xarajatlari qoplab berildi.
Belgilangan topshiriqqa asosan joriy yilning aprel oyida “Ishsiz va ishga joylashtirishga muhtoj aholining va norasmiy bandlarning manzilli ro‘yxatini shakllantirish uslubiyoti” ishlab chiqildi.
Aholi bandligi dasturini shakllantirish va ijrosini elektron axborot tizimi orqali onlayn monitoring qilib borish maqsadida vazirlikning “yangiish.mehnat.uz”elektron platformasi ishga tushirildi. Platformada tashkil etiladigan ish o‘rinlari hisobini loyihalar kesimida onlayn kuzatib borish, yaratilgan ish o‘rinlarining haqqoniyligini soliq organlari orqali monitoring qilib borish imkoniyati yaratildi.
Platformada shakllantirilgan ma’lumotlarga ko‘ra, joriy yilning yanvar-iyun oylarida 2,9 mln (rejaga nisbatan 127%) aholining daromadli ish bilan ta’minlanganligi soliq organlaridan ro‘yxatdan o‘tkazildi. jumladan:
– xizmat ko‘rsatish sohasida 1 mln 274 ming nafar (130%);
– qishloq xo‘jaligi yo‘nalishida 1 mln 532 ming nafar (124%);
– qurilish sohasida 85 ming nafar (138%);
– investitsiya loyihalarini ishga tushirish orqali 49 ming (115%) aholi yuqori daromadli ish bilan ta’minlandi.
Bundan tashqari, ijro muddati keyingi oylar va yil yakuniga qadar bo‘lgan 9 ta vazifa ijrosi bo‘yicha ham tizimli ishlar olib borilmoqda.
Xususan, nogironligi bo‘lgan shaxslarga munosib ish o‘rinlari yaratish orqali ular bandligini ta’minlashni 2 barobarga oshirish belgilangan.
Shu maqsadda, joriy yilning yanvar-iyul oylarida 14,2 ming nafar nogironligi bo‘lgan shaxslar bandligiga ko‘maklashildi. Qolaversa, joriy yilning 7 oyida 3 976 nafari kasb-hunarga o‘qitishga jalb qilindi.
Nogironlar bandligini ta’minlash ko‘rsatkichi o‘tgan yilning mos davriga nisbatan 1,4 baravarga oshirildi.
Xorijda vaqtincha mehnat faoliyatini amalga oshirish uchun chiqib ketgan xotin-qizlarning huquq va qonuniy manfaatlarini himoya qilishga ham alohida e’tibor qaratilmoqda. Joriy yil boshidan Migratsiya agentligining xorijdagi vakolatxonalari, vakilliklar va hududiy filiallar tomonidan mehnat faoliyatini amalga oshirish uchun xorijga chiqib ketgan 7 401 nafar xotin-qizlarning huquqlari va qonuniy manfaatlarini himoya qilish bo‘yicha yordamlar ko‘rsatilgan.
Xotin-qizlarni mehnat bozorida raqobatbardosh kasb-hunarlarga o‘qitish orqali bandligini ta’minlashga ko‘maklashish hamda ular o‘rtasida tadbirkorlikni rivojlantirish yuzasidan qo‘yilgan vazifa doirasida joriy yilning 7 oyida vazirlik tasarrufidagi kasbiy ta’lim muassasalari tomonidan zarur kasbiy malakaga ega bo‘lmagan 79 ming nafar xotin-qiz mehnat bozorida talab yuqori bo‘lgan kasblarga o‘qitishga jalb qilindi.
Davlat dasturida 423 ming ishsiz aholini ishga joylashtirishga ko‘maklashish vazifasi belgilangan bo‘lib, joriy yilning 7 oyida Bandlik bo‘limlari hamda hokim yordamchilari tomonidan jami 267 ming nafar (rejaga nisbatan 63 foiz) ishsiz yurtdoshlarimiz bo‘sh ish o‘rinlariga joylashtirildi.
Shuningdek, dasturda band bo‘lmagan shaxslarni, kambag‘al oilalarning ishsiz a’zolari va yoshlarni Monomarkazlar, davlat va nodavlat ta’lim muassasalarida kasb-hunar, xorijiy tillar va tadbirkorlik ko‘nikmalariga o‘qitish orqali bandligiga ko‘maklashish vazifasi belgilangan bo‘lib, mazkur topshiriq ijrosini ta’minlash maqsadida vazirlik tasarrufidagi kasbiy ta’lim muassasalari tomonidan zarur kasbiy malakaga ega bo‘lmagan 138 ming ishsizlar o‘qishga jalb qilindi.
Mazkur Davlat dasturi bilan, vazirlikka mamlakatda kambag‘allik darajasini kamaytirish, ishsizlar, ayniqsa xotin-qizlarni mehnat bozorida raqobatbardosh kasb-hunar va xorijiy tillarga o‘qitish, ishsiz aholini munosib ishga joylashtirish, mehnat migratsiyasi kabi ustuvor vazifalar yuklatilgan bo‘lib, yil oxiriga qadar dasturda belgilangan vazifalarning ijrosi so‘zsiz ta’minlanadi.