Qurilishda xavfsizlik: bugungi loqaydlik — ertangi fojia
2026-01-19 10:30:00 / Vazirlik yangiliklari
Rasmiy ma’lumotlar tahlili shuni ko‘rsatmoqdaki, respublikada qurilish obyektlarida mehnat xavfsizligini ta’minlash masalasi yildan-yilga keskinlashib bormoqda.
2024-yilda qurilish sohasida 204 ta mehnat faoliyati bilan bog‘liq baxtsiz hodisa qayd etilgan, ushbu hodisalar oqibatida 71 nafar ishchi vafot etgan.
2025-yilda esa holat yanada yomonlashgan: baxtsiz hodisalar soni 234 taga yetgan, halok bo‘lgan ishchilar soni 99-nafarni tashkil etgan. Ya’ni, hodisalar soni ham, o‘lim bilan tugayotgan holatlar ham o‘sish tendensiyasiga ega. Bu esa qurilishda mehnat xavfsizligi bilan bog‘liq jiddiy muammolar mavjudligini yaqqol ko‘rsatadi.
TAHLIL VA ASOSIY SABABLAR
🔸Baxtsiz hodisalarning aksariyati quyidagi omillar bilan bog‘liq:
🔸mehnat xavfsizligi talablariga amal qilmaslik;
🔸ishchilarni shaxsiy himoya vositalari bilan to‘liq ta’minlamaslik;
🔸qurilish maydonlarida doimiy nazoratning yo‘qligi;
🔸tashkilot rahbarlarining shaxsiy javobgarlikni his qilmasligi.
Eng xavotirli jihat — ko‘plab hodisalar oldindan bashorat qilinadigan, oldini olish mumkin bo‘lgan holatlar ekanligidir.
Ayanchli savol: qurilish tashkilotlari rahbarlari mehnat xavfsizligiga jiddiy munosabatda bo‘lishi uchun yana qancha ishchi halok bo‘lishi kerak?
Nazorat organlari profilaktik ishlarni kuchaytirishi, jiddiy choralar ko‘rish uchun yana qancha oila otadan, o‘g‘ildan, oila boquvchisidan ayrilishi kerak?
QURILISH TASHKILOTLARI RAHBARLARIGA!
Mehnat xavfsizligi — hisobot uchun emas, ishchining hayoti uchun.
Har bir baxtsiz hodisa — bu boshqaruvdagi kamchilik, nazoratsizlik va mas’uliyatsizlik oqibatidir.
VAKOLATLI DAVLAT ORGANLARIGA!
Qurilish sohasida: profilaktik nazoratni kuchaytirish, xavfli obyektlarni tizimli monitoring qilish, qonun buzilishlariga nisbatan muqarrar javobgarlikni ta’minlash, inson hayotiga befarq munosabatda bo‘lgan rahbarlarga qat’iy chora ko‘rish dolzarb vazifaga aylanishi lozim.
JAMOATCHILIKKA!
Mehnat xavfsizligi — faqat tashkilot yoki nazorat organlarining emas, butun jamiyatning umumiy mas’uliyati. Befarqlik fojialar sonini kamaytirmaydi.
AGAR BUGUN QAT’IY XULOSA QILINMASA, ERTAGA RAQAMLAR YANADA OSHISHI, BOLALAR OTASIZ, OILALAR BOQUVCHISIZ QOLISHI MUMKIN.