Toshkent shahri                                                                                         2024-yil 23-aprel

So‘nggi yillarda Buyuk Britaniya va O‘zbekiston o‘rtasidagi munosabatlar ko‘plab sohalarda sezilarli darajada kengayib bormoqda. Jumladan, migratsiya sohasidagi yangiliklar ham alohida e’tirofga loyiq.

2024-yil 23-aprel kuni Toshkent shahridagi “Ishga marhamat” monomarkazida Kambag‘allikni qisqartirish va bandlik vazirligi, Buyuk Britaniyaning “NEU Professionals”* rekruting agentligi vakillari hamda tashkilotchilar ishtirokida matbuot anjumani bo‘lib o‘tdi.

Vazirlik mas’ullari O‘zbekistonda mehnat migratsiyasi sohasida amalga oshirilgan islohotlar: xorijda vatandoshlarimizning huquq va manfaatlarini himoya qilishga qaratilgan Prezident qarorlari, sohada yaratilgan qulayliklar to‘g‘risida to‘xtaldilar.

Angliya delegatsiyasi vakillari, Buyuk Britaniyada tibbiyot sohasi xodimlarga talab juda yuqori ekanligini ta’kidlashib, o‘zbekistonlik 10 mingdan ortiq soha vakillarini chet tillariga o‘qitish orqali ishga qabul qilib, 3 ming AQSH dollari miqdorida oylik maosh to‘lashga tayyorligi bildirdilar.

Angliya tomoni o‘zbekistonlik tibbiyot sohasi vakillarini kelgusida xorijdan kelib ishlovchilar bo‘yicha TOP-3 talikka olib chiqishni rejalashtirayotganliklarini ta’kidlashib, o‘zbekistonlik hamshiralar doimiy o‘rta tibbiyot xodimlari sifatida faoliyat yuritish bilan cheklanib qolmasligini, balki aksincha o‘z qobiliyati, intilishi, tajribasi va til bilishidan kelib chiqib, xizmat karerasida o‘sish imkoniga ega bo‘lishi qayd etishdi.

Bundan tashqari, “NEU Professionals” kompaniyasi Koventri universitetining Toshkentdagi Raqamli iqtisodiyot va agrotexnologiyalar universiteti bilan hamkorlikda ishlar olib borayotgani, kelajakda kompaniya kelgusida Buyuk Britaniya bilan cheklanibgina qolmay, Yangi Zelandiya, Avstraliya, Irlandiya kabi ingliz tilida so‘zlashuvchi davlatlardan ham O‘zbekistonga bo‘sh ish o‘rinlarini taklif etishini aytib o‘tdilar.

Anjumanida ko‘tarilgan masalalar yuzasidan “yo‘l xaritasi” tuzilib amaliy harakatga o‘tishi belgilab olindi. Ochiq va samimiy muloqot shaklida o‘tgan anjuman yakunida OAV vakillari o‘zlarini qiziqtirgan savollarga batafsil javob olishdi.

Ma’lumot uchun, joriy yilning 1-choragida jami 23 535 nafar yurtdoshlarimiz xorijda vaqtincha ishlash uchun chet davlatlarga borgan. Shulardan 795 nafari Buyuk Britaniya  hissasiga to‘g‘ri keladi.

*“NEU Professionals” rekruting kompaniyasi — 2013-yilda chet ellik tibbiyot mutaxassislarni Buyuk Britaniyaning Oksford universiteti shifoxonasi va boshqa tibbiyot muassasalariga yollashda yordam berish maqsadida tashkil etilgan. Hozirda ushbu kompaniya, xorijdan Angliya va Uyels bo‘ylab kadrlarni yetkazib berish bilan shug‘ullanib kelmoqda.

Manzil: Toshkent shahri, Yashnobod tumani, Parkent ko‘chasi, 331-uy.

Tadbirning boshlanish vaqti: 2024-yil 23-aprel soat 11:00

Press-relizning elektron nusxasini olish uchun

 QR-kodni skaner qiling: