Hurmatli tumanimiz ahli!

Bugungi kunda mamlakatimizda korrupsiyaga qarshi kurashish davlat siyosatining ustuvor yo‘nalishlaridan biri sifatida izchil amalga oshirilmoqda. Davlatimiz rahbari tomonidan ilgari surilayotgan ochiqlik, shaffoflik va halollik tamoyillari barcha sohalarda samarali natijalar berib, jamiyatimizda korrupsiyaga nisbatan murosasiz munosabatni shakllantirishga xizmat qilmoqda.

Korrupsiya – taraqqiyotga to‘siq, adolat va qonun ustuvorligiga tahdid soluvchi salbiy illatdir. Shu bois, ushbu muammoga qarshi kurash faqat davlat organlarining emas, balki har bir fuqaroning fuqarolik burchi va mas’uliyatidir.

Tumanimizda korrupsiyaning oldini olish, davlat xizmatlari ko‘rsatish jarayonlarida shaffoflikni ta’minlash, byudjet mablag‘laridan samarali foydalanish hamda aholi murojaatlarini o‘z vaqtida ko‘rib chiqish bo‘yicha tizimli ishlar amalga oshirilmoqda. Barcha tashkilot va muassasalarda rahbar hamda xodimlar ishtirokida targ‘ibot-tashviqot tadbirlari, o‘quv-seminarlar va davra suhbatlari tashkil etilib, halollik va qonuniylik tamoyillariga qat’iy rioya etish yuzasidan tushuntirish ishlari olib borilmoqda.

Shuningdek, tumanda ochiqlikni ta’minlash maqsadida hokimlikning rasmiy veb-sayti va ijtimoiy tarmoqlardagi sahifalari orqali muhim ijtimoiy-iqtisodiy ma’lumotlar muntazam e’lon qilib borilmoqda. Aholi bilan ochiq muloqot qilish, murojaatlarni tezkor va adolatli hal etish ham doimiy e’tiborimiz markazida bo‘lib qolmoqda.

Aziz yurtdoshlar!

Yurtimizda olib borilayotgan islohotlarning muvaffaqiyati, avvalo, jamiyatda halollik va adolat muhitining qaror topishiga bog‘liq. Shu bois, barchangizni korrupsiyaning har qanday ko‘rinishiga nisbatan murosasiz bo‘lishga, qonunlarga hurmat bilan yondashishga va tumanimiz ravnaqi yo‘lida faol ishtirok etishga chorlayman.

Unutmang, halollik va poklik ustuvor bo‘lgan jamiyatda taraqqiyot, farovonlik va adolat qaror topadi. Korrupsiyaga qarshi kurashda har birimizning hissamiz muhim.

Korrupsion holatlarga duch kelsangiz, tegishli tashkilotlarga yoki hokimlikning ishonch telefonlariga murojaat qiling. Sizning faol fuqarolik pozitsiyangiz tumanimizni yanada rivojlantirish va uni korrupsiyadan xoli hududga aylantirishga xizmat qiladi.

Barchangizga sihat-salomatlik, oilaviy baxt va farovonlik tilayman!

Hurmat bilan,
Jasurbek Abdurayimov
Baliqchi tumani hokimi