AGROSANOATNI RIVOJLANTIRISH AGENTLIGI DIREKTORI ABDULLAYEV NURALI YUSUFALIVICHNING
KORRUPSIYAGA QARSHI KURASHISH BO‘YICHA
MUROJAATI

Korrupsiya dunyo miqyosida hal etilishi lozim bo‘lgan global muammolardan biri ekanligi, ushbu illat har qanday davlat va jamiyatning siyosiy-iqtisodiy rivojlanishiga jiddiy putur yetkazib, inson huquq va erkinliklarining poymol bo‘lishiga olib kelayotganligini yaxshi bilamiz. Shu bois, unga qarshi kurash xalqaro hamjamiyat doirasida ahamiyat kasb etib, jahon siyosatining muhim masalalari qatoridan joy olgani bejiz emas. 

So‘nggi yillarda mamlakatimizda korrupsiyaning oldini olish va unga qarshi kurashish maqsadida barcha sohalarda keng ko‘lamli islohotlar izchil amalga oshirilmoqda.

Prezidentimiz Sh.M.Mirziyoyev o‘z ma’ruzalarida “Jamiyatimizda korrupsiya, turli jinoyatlarni sodir etish va boshqa huquqbuzarlik holatlariga qarshi kurashish, ularga yo‘l qo‘ymaslik, jinoyatga jazo, albatta, muqarrar ekani to‘g‘risidagi qonun talablarini amalda ta’minlash bo‘yicha qat’iy choralar ko‘rishimiz zarur”ligini, qayta-qayta tilga oladilar.

Korrupsiya va poraxo‘rlik jamiyat barqarorligining muhim asosi bo‘lgan ijtimoiy va huquqiy adolatning yo‘qolishiga olib keladi. Mamlakatimiz mustaqilligi, xalqimiz farovonligi, yurtmiz rivoji va gullab yashnashi va obod bo‘lishi har bir fuqaroda milliy g‘ururning qay darajada shakllanganligiga bog‘liq. Bu kabi shahslar eng avvalo pora olish va berish illatidan xalos bo‘lishi, bir so‘z bilan aytganda «halollik vaksinasi» bilan emlanishi zarur. 

Shu bilan birga, Agentlik tizimi faoliyatida korrupsiya bilan bog‘liq huquqbuzarliklarni profilaktika qilish va ularga barham berishga qaratilgan vazifalar va yo‘nalishlar belgilab olinib, korrupsiyaviy xavf-xatarlarni aniqlash, baholash, shuningdek, ularni kamaytirish bo‘yicha tadbirlar amalga oshirib kelinmoqda. Agentlik tizimida korrupsiyaga nisbatan murosasiz munosabatni shakllantirish, korrupsiyaning oldini olishga doir targ‘ibot tadbirlari, vazirlik tizimida faoliyat yuritayotgan xodimlarning huquqiy ongi va madaniyatini yuksaltirish bo‘yicha o‘quv seminarlari, treninglar, brifinglar va davra suhbatlari tashkil etib borilmoqda.

  Shu o‘rinda, Agentlik tizimida faoliyat yuritayotgan barcha xodimlarga shuni alohida ta’kidlagan bo‘lar edim-ki, korrupsiyaga mutlaqo toqatsizlik tamoyiliga tayangan holda korrupsiya bilan bog‘liq har qanday xatti-harakatlarda ishtirok etmang, boshqa shaxslarning manfaatlarini ko‘zlab harakat qilmang, pora olish yoki g‘ayriqonuniy boshqa maqsadlarda o‘z xizmat mavqeyingizdan noqonuniy foydalanmang.

  Sizlar, mehnat faoliyatingizdagi yuridik va jismoniy shaxslar bilan munosabatlarda halol, adolatli va mustaqil xulq-atvor namunasi bo‘lishingiz, o‘z mansab majburiyatingizni bajarishingiz doirasida, korrupsiyaning barcha shakllari va ko‘rinishlariga murosasiz munosabatni shakllantirgan holda korrupsiyaga qarshi kurashish bo‘yicha qonunchilik normalari va qabul qilingan ichki hujjatlarga rioya qilishingiz lozim.

  Biz shuni unutmasligimiz kerakki, korrupsiya ma’lum bir sohaga emas, balki butun jamiyat taraqqiyotining inqiroziga olib keladi, davlatni ich-ichidan yemiradi. Hozirda korrupsiyaga qarshi kurashish maqsadlariga faqat tashkiliy-huquqiy vositalar bilan erishib bo‘lmasligini hayotning o‘zi ko‘rsatmoqda.

  O‘ylaymanki, jamiyat kushandasi bo‘lgan ushbu illatga qarshi kurashda nafaqat davlat tashkilotlari, balki, jamiyat va umuman barcha fuqarolarimiz mas’uldir. Biz korrupsiyaning oqibatlari bilan kurashishdan uning barvaqt oldini olishga o‘tishimiz lozim. Shunday ekan, davlat va jamoat tashkilotlari bu illatni oldini olishi va unga qarshi kurashda hamjihat bo‘lishi samarali natijalarga erishishning eng maqbul yo‘li bo‘lib hisoblanadi.

Shuningdek, Agentlik tizimida ishlayotgan xodimlarning qonunchilikka zid xatti-harakatlari yoki harakatsizliklarining guvohi bo‘lsangiz yoki xodimlarning korrupsiya va boshqa huquqbuzarlik holatlariga aloqadorligi yuzasidan ma’lumotlarga ega bo‘lsangiz, Agentlikning quyida keltirilgan aloqa kanallari orqali Korrupsiyaga qarshi ichki nazorat bo‘limini xabardor qilishlari lozim.

Sodir etilgan har qanday korrupsiyaviy jinoyat sirligicha qolmaydi, albatta oshkor bo‘ladi. Shuning uchun, men sizlarni ogohlantirmoqchiman, har qanday jinoyat uchun jazo muqarrar, buni har birimiz teran his qilishimiz zarur. 

Sizu biz, xammamiz birgalikda korrupsiyaga qarshi murosasiz kurash olib boraylik!

E’tiboringiz uchun tashakkur!

📞 Ishonch telefoni: +998 (95) 450-59-50
📞 Call-markazi: 1342
📱 Telegram-bot: @ARA_antikor_bot
🌐 Rasmiy veb-sayt: gov.uz/oz/agrosanoat
✉️ Elektron pochta manzili: garden@agro.uz