Shu yilning 16-iyul kuni Toshkent shahrida Savdo-iqtisodiy, ilmiy-texnikaviy va madaniy hamkorlik bo‘yicha O‘zbekiston-Turkmaniston qo‘shma komissiyasining 18-yig‘ilishi bo‘lib o‘tdi.
Tadbirga O‘zbekiston Respublikasi Bosh vazirining o‘rinbosari Jamshid Xo‘jaev va Turkmaniston Vazirlar Mahkamasi Raisining o‘rinbosari Botir Atdaev hamraislik qildi. Unda ikki mamlakat vazirliklari, idoralari, tarmoq birlashmalari, mahalliy hokimiyat organlari rahbarlari ham ishtirok etdi.
Konstruktiv fikr almashish chog‘ida ikki tomonlama hamkorlikning bugungi holati, mavjud kelishuvlarni amalga oshirishning borishi muhokama qilindi, ko‘p qirrali munosabatlarni yanada rivojlantirishning istiqbolli yo‘nalishlari belgilab olindi.
Ikki davlat rahbarlari oʻrtasidagi konstruktiv muloqot va ishonchga asoslangan munosabatlar tufayli uzoq muddatli va oʻzaro manfaatli ikki tomonlama hamkorlikni mustahkamlash va rivojlantirishda ijobiy dinamika kuzatilayotganigi taʼkidlandi.
Savdo-iqtisodiy hamkorlikni kengaytirishda yaxshi natijalarga erishilganligi qayd etildi. Oxirgi 5 yil ichida tovar ayirboshlash hajmi ikki baravar koʻpayib, oʻtgan yil oxiriga kelib 1 milliard dollardan oshdi. Shu bilan birga, bor imkoniyatlardan to‘liq foydalanish, jumladan, O‘zbekiston-Turkmaniston chegarasidagi savdo zonalarini ishga tushirish maqsadga muvofiqligi qayd etildi.
Tomonlar kimyo, avtomobilsozlik, elektrotexnika sanoatida sanoat kooperatsiyasini rivojlantirishning dolzarb masalalarini, shuningdek, hududlararo forumi, O‘zbekiston-Turkmaniston ishbilarmonlar kengashi yigilishlari hamda mamlakatlarimiz ishbilarmon doiralari o‘rtasidagi aloqalarni rivojlantirish uchun samarali platforma hisoblangan savdo-sanoat ko‘rgazmalari kabi hamkorlik formatlarini rivojlantirish choralarini ko‘rib chiqdilar.
Ikki mamlakat o‘rtasidagi transport aloqalarini kengaytirishni nazarda tutgan holda, transport-logistika sohasidagi hamkorlikni rivojlantirish istiqbollari alohida muhokama qilindi. Turkmaniston tomonini amaldagi va rejalashtirilayotgan multimodal transport yo‘laklariga qo‘shish hamda ikki davlat hududi orqali xalqaro tashishlar ishtirokchilari uchun viza tartib-taomillarini soddalashtirish masalalarini hal etish imkoniyatlari ko‘rib chiqildi.
Tomonlar madaniy-gumanitar hamkorlikni kengaytirish istiqbollarini ham ko‘rib chiqdilar. Bu borada qoʻshma taʼlim dasturlarini yaratish, qishloq va suv xoʻjaligi sohasida kadrlar tayyorlash, oʻqituvchi va talabalar almashinuvi, shuningdek, turizmni rivojlantirish boʻyicha yangi tashabbuslarni ishlab chiqish ustuvor vazifalardan hisoblanadi.
Uchrashuv yakunlari bo‘yicha tomonlar Qo‘shma komissiyaning 18-yig‘ilishining yakuniy bayonnomasini hamda talabga ega bo‘lgan tovarlar va xizmatlarni o‘zaro yetkazib berish uchun yangi imkoniyatlar ochuvchi kelishuvlarni imzoladilar.