Oliy Majlis Qonunchilik palatasining navbatdagi majlisida Kambag‘allikni qisqartirish va bandlik vaziri Behzod Musayevning “2024-yilda yangi ish o‘rinlarini tashkil etish va aholi bandligiga ko‘maklashish dasturining ijrosi bo‘yicha amalga oshirilayotgan ishlar to‘g‘risida”gi axboroti eshitilmoqda. 

Ta’kidlanganidek, mamlakatimizda so‘nggi 7 yilda bandlik sohasidagi islohotlarning huquqiy asoslarini mustahkamlash va sohani tubdan takomillashtirishga qaratilgan 5 ta qonun, 1 ta kodeks, 30 dan ortiq Prezident farmon va qarorlari qabul qilindi.

“Aholi bandligi to‘g‘risida”gi qonun va yangi tahrirdagi Mehnat kodeksi bilan aholi bandligini ta’minlashda zamonaviy kasbiy va mehnat standartlarini joriy etish, mehnat munosabatlari xalqaro miqyosda tan olingan, ham ish beruvchining ham xodimning manfaatlari himoyasini ta’minlovichi huquqiy poydevor yaratildi.

Mamlakatimiz Prezidenti tomonidan aholi bandligi va daromadlarining o‘sishini ta’minlash, kambag‘allikni qisqartirish, ushbu masalalarning huquqiy asoslarini yanada takomillashtirishga alohida e’tibor qaratib kelinmoqda.

 Joriy yilning birinchi yarmida “Sayxunobod”, “Uychi”, “G‘ijduvon” va “Zarbdor” tajribalari boshlanib, iqtisodiy kompleks mahallaga tushirilgani hisobiga 4 mingdan ortiq mahalla sanoat va qishloq xo‘jaligiga ixtisoslashib, 1 million 600 ming aholi rasmiy band bo‘lgan. 

Yil yakuniga qadar ushbu tajribalar asosida 2 million 416 ming aholi bandligini ta’minlash rejalashtirilgan.

Shu bilan birga, davlatimiz rahbarining 2024-yil 9-yanvardagi tegishli qarorida belgilangan vazifalar ijrosini samarali ta’minlash bo‘yicha bir qator ishlar amalga oshirilmoqda. 

Xususan, bandlik dasturi doirasida tashkil etilgan ish o‘rinlari va band bo‘lgan aholini onlayn rejimda kuzatib borish maqsadida tegishli vazirlik va idoralarning elektron ma’lumotlar bazasiga integratsiya qilingan “yangiish.mehnat.uz” elektron platformasi ishga tushirildi.

Ushbu elektron platforma orqali joriy yilning birinchi yarim yilligida doimiy, mavsumiy va vaqtinchalik ishlarda 2,9 mln nafar aholining bandligi ta’minlangan.

Majlisda qayd etilganidek, 2024-yilning yanvar-iyun oylarida bandlik bo‘limlari tomonidan 368,4 ming aholiga bandlik xizmatlari ko‘rsatilgan.  

Shuningdek, 8,1 mingta korxona va tashkilot tomonidan taqdim etilgan 26,7 ming buyurtmaga asosan, 55,6 ming nafar band bo‘lmagan aholi haq to‘lanadigan jamoat ishlariga jalb etilgan.

2024-yilning dastlabki 6 oyida 11,8 ming nafar nogironligi bo‘lgan shaxsning bandligiga ko‘maklashilgan.

Oliy Majlis Qonunchilik palatasining navbatdagi majlisida Kambag‘allikni qisqartirish va bandlik vaziri Behzod Musayevning “2024-yilda yangi ish o‘rinlarini tashkil etish va aholi bandligiga ko‘maklashish dasturining ijrosi bo‘yicha amalga oshirilayotgan ishlar to‘g‘risida”gi axboroti ma’lumot uchun qabul qilindi va kun tartibidagi masala yuzasidan samarali parlament nazoratini ta’minlashga kelishib olindi.

Oliy Majlis Qonunchilik palatasining navbatdagi majlisida Kambag‘allikni qisqartirish va bandlik vaziri Behzod Musayevning “2024-yilda yangi ish o‘rinlarini tashkil etish va aholi bandligiga ko‘maklashish dasturining ijrosi bo‘yicha amalga oshirilayotgan ishlar to‘g‘risida”gi axboroti ma’lumot uchun qabul qilindi va kun tartibidagi masala yuzasidan samarali parlament nazoratini ta’minlashga kelishib olindi.