Ўзбекистон Республикаси Сув хўжалиги вазирлиги

Тадбирда Сурхондарё вилояти прокурори ўринбосари, адлия катта маслаҳатчиси Баҳодир Эркаев сўзга чиқиб, залда йиғилганларга Ўзбекистон Республикасининг «Коррупцияга қарши курашиш тўғрисида» ҳамда «Манфаатлар тўқнашуви тўғрисида»ги қонунларининг мазмун-моҳияти, шунингдек, Ўзбекистон Республикаси Президенти Шавкат Мирзиёев томонидан коррупцияга қарши курашиш миллий кенгаши мажлисида белгилаб берилган устувор йўналишлар хусусида батафсил маълумот берди.

Таъкидланганидек, ижтимоий ҳаётда ҳар биримиз ҳар соатда коррупция ва порахўрликнинг турли усулларига дуч келамиз, бироқ, «ўзбекчилик» деймиз, ўша тамагирлар инсофга келар, деган лоқайд муносабатда бўламиз. Ҳар куни «Коррупция ва порахўрликни камайтирайлик» деган мазмундаги тадбирлар, йиғилишлар ўтказгандан наф камроқ, аксинча халқимиз онгига чуқур сингиб кетган «пора узатиш-пора олиш» усулларидан воз кечмас эканмиз, бу иллатларни тугатиш осон кечмайди. Шунинг учун ҳар бир шахс аввало бурчини виждонан бажарса, «ҳалоллик вакцинаси»ни ўз турмуш тарзига сингдирса, коррупционерларга қарши далил курашсагина, одамлар ҳалол ва бехавотир яшашга одатланади.

Тадбир якунида мутахассислар ва ирригаторлар ўртасида савол-жавоб тарзида ўтказилган жонли мулоқот жараёнида коррупция ва порахўрликка чек қўйишнинг турли усуллари ҳақида фикр-мулоҳазалар билдирилди.

Аму-Сурхон ИТҲБ матбуот хизмати