ТЕРМИЗ ТУМАНИ СУВЧИЛАРИГА ЭЛЕКТРОСКУТЕРЛАР ТАРҚАТИЛДИ
2025-05-14 15:20:00 / Янгиликлар
Географик жиҳатдан қараганда Сурхондарё вилоятининг кичикроқ туманига ўхшайдиган Термиз туманининг ҳудуди ниҳоятда чўзилиб кетган. Бир томони қўшни Афғонистон ва Тожикистон давлатлари билан чегарадош бўлса, иккинчи ва учинчи томони Жарқўрғон, Ангор ва Музработ туманларига бориб туташади. Экин майдонлари эса ўнга яқин катта каналлар ва юзлаб километр узунликдаги ички суғориш тармоқлари ёрдамида обиҳаёт билан таъминланади.
Термиз тумани «Сув етказиб бериш хизмати» давлат муассасаси раҳбарлари ирригаторларнинг меҳнати машаққатли эканлигини инобатга олиб, далаларга сув етказиб беришда фидойилик кўрсатаётган ходимларига ғамхўрлик кўрсатиш, уларни ижтимоий қўллаб-қувватлаш ва ҳар томонлама қулайлик яратиш чораларини изламоқда. Ўзбекистон Республикаси Президентининг 2024 йил 5 январдаги тегишли қарорига асосан сув ресурсларидан фойдаланганлик учун солиқдан давлат бюджетига тушган тушумнинг 40 фоизини ДМлар фаолиятини молиялаштириш, уларнинг балансидаги объектларни сақлаш ва техник ҳолатини яхшилаш, шунингдек, меҳнатда ўрнак кўрсатаётган ходимларни рағбатлантириш харажатларига йўналтирилаётгани туфайли Термиз тумани ДМ раҳбарияти ҳам олис ҳудудларда ишлаётган сув назоратчилари, канал бошлиқлари ва тажрибали миробларнинг ишини ҳар томонлама енгиллаштириш мақсадида уларнинг 10 нафарини электроскутер ҳамда кийим-кечаклар билан таъминлади.
Ирригаторларга электроскутерлар топшириш маросимида Аму-Сурхон ИТҲБ бошлиғининг биринчи ўринбосари Н.Худойберганов иштирок этди ва узоғи билан бир ой орасида яна бошқа ҳудудларда ишлаётган канал бошлиқлари ва сув назоратчилари замонавий техникалар билан таъминланишини билдирди.
Аму-Сурхон ИТҲБ матбуот хизмати