Ўзбекистон Республикаси Сув хўжалиги вазирлиги

Минтақамиздаги энг нуфузли анжуманлар, саммитлар кун тартибига иқлим ўзгариши ва у билан боғлиқ сув ресурсларига дахлдор масалаларнинг киритилиши бежизга эмас. Сабаби, сувни бугун асрамасак, эртага уни топа олмаймиз.

Давлатимиз раҳбарининг жорий йил 30 январдаги ПФ-16-сонли Фармони билан тасдиқланган “Ўзбекистон-2030” стратегиясини “Атроф-муҳитни асраш ва “яшил иқтисодиёт” йилида амалга оширишга оид давлат дастурида ҳам сув масаласи алоҳида эътиборга олинган.

Мазкур Фармон билан Сув хўжалиги вазирлигига асосий ижрочи бўлган 35 та ҳамда тенг кучли ижрочи бўлган 5 та топшириқ белгиланган.

Бугунги кунга қадар 4 та топшириқ бажарилди. Қолганлари бўйича ишлар давом этаяпти. Мисол учун, 12 та йирик сув хўжалиги объектларини автоматлаштирилган бошқарув тизимига ўтказиш белгиланган. Бугунги кунга қадар 3 та (Жиззахда 2 та, Самарқандда 1 та) объектда қурилиш-монтаж ишлари якунланиб, объектлар фойдаланишга топширилган. 9 та объектнинг барчасида лойиҳа-смета ҳужжатлари ишлаб чиқилиб, экспертиза хулосалари олинган ҳамда 8 та объект бўйича пудратчи ташкилотлар аниқланиб, қурилиш-монтаж ишлари бошланган, 1 та объект тендер савдоларига қўйилган.

Табиий ресурсларни тежаш ва улардан оқилона фойдаланиш, экологик барқарорликни таъминлаш мақсадида 1 минг километр каналларни бетон қопламага ўтказиб, сув тежовчи технологиялар қамровини 1,6 миллион гектарга етказиш ҳисобига йилига қўшимча 2,5 миллиард метр куб сувни тежашга эришилишини таъминлаш бўйича ҳам ишлар давом эттирилмоқда.  

Кеча Сув хўжалиги вазирлигида ўтказилган йиғилишда Президентимизнинг жорий йил 30 январдаги ПФ-16-сонли Фармонида белгиланган топшириқлар ижроси муҳокама қилинди. Йиғилишни олиб борган Сув хўжалиги вазири Ш.Хамраев бу борадаги ишлар талаб даражасида эмаслигини таъкидлади.

Насос станцияларидаги эскирган 70 та насос ва 76 та электродвигателларни замонавий энергия тежамкорларига алмаштириш, сув ресурслари ҳисобини такомиллаштириш орқали насос станцияларининг электр энергия истеъмолини 300 млн. кВт. гача камайтириш бўйича олиб борилаётган ишлар танқидий таҳлил қилинди.

Масъулларга биринчи ярим йилликда белгиланган барча топшириқларни ўз муддатида ва сифатли бажаришни таъминлаш вазифаси юклатилди.

Ернинг қони, экиннинг жони бўлган сув ресурсларидан қишлоқ хўжалиги экинларини суғоришда самарали фойдаланиш, унинг ҳисоб-китобини тўғри юритиш, ички суғориш тармоқларини тозалашни давом эттириш ва бошқа мавсумий юмушларни сифатли бажариш бўйича кўрсатмалар берилди.

Ахборот хизмати