Ўзбекистон Республикаси Сув хўжалиги вазирлиги

Сув билан боғлиқ касб эгалари сувдек тоза, ҳалол, пок инсонлар. Лекин, гуруч курмаксиз бўлмайди деганларидек, билиб билмай нопок ишларга қўл урадиганлар, коррупцияга йўл қўядиганлар учраб туради.

Бугун вазирлик томонидан видеоселектор йиғилиши ўтказилиб, коррупцияга қарши курашиш чоралари муҳокама қилинди. Унда Сув хўжалиги вазири, ўринбосарлари, ҳудудий ва тизим ташкилотлари раҳбарлари, мутахассислар иштирок этди.

Ўзбекистон Республикаси Президенти Шавкат Мирзиёев 5 март куни Коррупцияга қарши курашиш миллий кенгаши йиғилишида сўзлаган нутқида коррупция ислоҳотлар йўлидаги энг катта тўсиқ ва ғов эканини таъкидлади.

Шу боис сўнгги йилларда бу иллатга қарши курашиш бўйича қонунлар қабул қилиниб, янги тизим яратилди. Энг муҳими, жамиятда коррупция муаммосини жамоатчилик муҳокамасига олиб чиқадиган очиқ тизим, очиқ муҳит яратилди.

Йиғилишда Сув хўжалиги вазири Ш.Хамраев Давлатимиз раҳбарининг нутқидан келиб чиқиб, коррупцияга қарши курашиш умуммиллий вазифа, ҳар бир ватанпарвар юртдошимизнинг, шу жумладан, сувчиларнинг виждон иши эканини таъкидлади.

Соҳани рақамлаштириш, шаффоф ва очиқ тизим яратиш – коррупцияга қарши курашишнинг муҳим омили эканлигини эътироф этди.

Видеоселектор йиғилишида Ўзбекистон Республикаси Бош прокуратураси бошқарма катта прокурори С.Қурбонов иштирок этиб, коррупцияга оид ҳуқуқбузарликларнинг олдини олиш, ушбу иллатга қарши кураш доирасида кўрилаётган чора-тадбирлар ҳақида маъруза қилди. Тизимда меҳнат қилаётган ходимларнинг, айниқса, ёшларнинг ҳуқуқий онгини юксалтириш, жамиятда коррупцияга қарши курашишга дахлдорликни шакллантириш зарурлигини айтиб ўтди. Жиноятга жазо муқаррарлиги таъминланишини мисоллар орқали тушунтириб берди.

Йиғилиш иштирокчиларини коррупция ҳолатларига дуч келганида “1161” рақамли “Ишонч телефони” ёки @bpantikoruz_bot телеграм боти орқали хабар беришга чақирди.

Шунингдек, видеоселектор йиғилишида сув фонди ерларини рўйхатдан ўтказиш, ҳудудий сув хўжалиги ташкилотлари ҳисобидаги кўчмас мулк объектларидан фойдаланиш ҳолати, “Камбағалликдан фаровонлик сари” дастури доирасидаги ишлар танқидий муҳокама қилинди, камчиликларни бартараф юзасидан топшириқлар берилди.

Ахборот хизмати