Ўзбекистон Республикаси Сув хўжалиги вазирлиги

Шу муносабат билан ҳар йили “Тошкент ирригация ва қишлоқ хўжалигини механизациялаш муҳандислари институти” Миллий тадқиқот университетида тадбир ўтказилади.

Бутунжаҳон сув кунига бағишлаб бугун Миллий тадқиқот университетида бўлиб ўтган тадбирда Ўзбекистон Республикаси Сув хўжалиги вазири Ш.Хамраев, халқаро ташкилотлар вакиллари, университет профессор-ўқитувчилари, тадқиқотчилар иштирок этди.

Университет ректори, профессор Б.Мирзаев анжуманни кириш сўзи билан очди.

Иқлим ўзгариши, турли экологик ҳолатлар, табиатга боғлиқ бўлмаган вазиятлар нафақат Ўзбекистонда, балки бутун дунёда сув қадрини ошириб, уни асрашни тақозо этяпти. Шу боис, дунё ҳамжамияти, мамлакатлар, нуфузли халқаро ташкилотлар сувни тежашга эътибор қаратиб, аниқ мақсадли чоралар ишлаб чиқяпти.

Анжуманда Сув хўжалиги вазири Марказий Осиёнинг умумий сув захираларидан оқилона фойдаланиш минтақада хавфсизлик ва барқарорликни таъминлаш, тараққиётга эришишнинг муҳим омилларидан бири эканлигини таъкидлади.

Президент Шавкат Мирзиёевнинг оқилона сиёсати, саъй-ҳаракатлари натижасида қўшни давлатлар билан йўлга қўйилган ўзаро дўстона ва ишончли алоқалар Марказий Осиё минтақасидаги трансчегаравий сув ресурсларидан ҳамкорликда фойдаланишга мустаҳкам замин яратганлигини эътироф этди.

Бу йил Бутунжаҳон сув куни “Музликларни асраш” мавзуси остида нишонланмоқда.

Тадбирда сув ресурслари билан боғлиқ мавзуларда маърузалар тингланди, тақдимотлар ўтказилди.

“Сувни тежаш ҳар бир инсоннинг бурчидир” видеороликлар танлови, “Ёшлар музликларни асраш учун нима қилиши мумкин? Қандай қилиб?” мавзуси бўйича викторина (жамоавий) танлови, “Музликларни асраш” мавзусидаги фотосурат (постерлар) танлови ғолибларини тақдирлаш маросими ўтказилди.

Ахборот хизмати