СУВЧИ АЁЛГА ЭҲТИРОМ
2025-12-11 17:20:00 / Янгиликлар
Мамлакатимизда қишлоқ ва сув хўжалиги тизимида кўп йиллардан буён фидокорона меҳнат қилаётган, соҳа тараққиётини янги босқичга кўтаришга ҳисса қўшаётган мутахассислар меҳнати юксак қадрланмоқда.
Сайхунобод тумани “Сув етказиб бериш хизмати” давлат муассасаси бош муҳандиси Зохида Рахманова Президентимиз Фармонига асосан “Шуҳрат” медали билан тақдирланди. Шунингдек, у “Ўзбекистон Республикаси Сув хўжалиги аълочиси” кўкрак нишонига ҳам сазовор бўлди.
Қуйи Сирдарё ИТҲБ бошлиғи Нуркамол Атақулов сирдарёлик сувчилар номидан Зохида Рахмановани қутлади.
– Сув ресурсларини бошқариш, сувдан фойдаланиш маданиятини юксалтиришда Зохида опанинг ҳиссаси беқиёс, – деди Қуйи Сирдарё ИТҲБ бошлиғи Нуркамол Атақулов. – Бундай фидоий, масъулиятли ва ташаббускор ходимларимиз билан фахрланамиз. Уларнинг меҳнати нафақат бир ҳудуд, балки бутун соҳа тараққиёти учун хизмат қилади.
Қуйи Сирдарё ИТҲБ матбуот хизмати