НИДЕРЛАНДИЯ БИЛАН СУВ ХЎЖАЛИГИ СОҲАСИДА ҲАМКОРЛИК КЕНГАЯДИ
2024-04-26 19:10:00 / Янгиликлар
Сув хўжалиги вазири Шавкат Хамраев меҳмонларни юртимизга ташрифи билан қутлади.
- Нидерландия Қироллигининг сув сиёсатидан яхши хабардормиз. Ушбу мамлакатнинг сув ресурсларини бошқариш тажрибасини ўрганиш, илмий тадқиқот институтлари ва университетлари билан ҳамкорлик йўлга қўйилган. Биз ушбу мамлакат билан алоқаларни ривожлантиришдан манфаатдормиз, - деди вазир мулоқотни бошлар экан.
Нидерландия ҳудудининг 40 фоизи денгиз сатҳидан пастда жойлашган. Мамлакат узоқ йиллардан буён сув муаммолари билан курашиб келади. Кейинги йилларда иқлим ўзгариши, қурғоқчилик ўз таъсирини кўрсатмоқда.
- Биз сув ресурсларини бошқариш ва тежамкорлик билан фойдаланиш борасида тўплаган тажрибаларимизни бўлишишга тайёрмиз. Шу билан биргаликда, қурғоқчилик таъсирини юмшатиш, трансчегаравий дарёлар сувидан фойдаланишда ҳамкорликни мустаҳкамлаш масалаларида ўрганадиган жиҳатларимиз ҳам бор, -деди элчи жаноблари.
Учрашувда Ўзбекистон ва Нидерландия ўртасида сиёсий маслаҳатлашувларнинг навбатдаги даврасини ўтказиш ҳамда сув хўжалиги соҳасида икки томонлама ҳамкорлик масалалари муҳокама қилинди.
Сув хўжалиги йўналишида Ўзбекистон билан янги лойиҳа ишлаб чиқиш, илмий ҳамкорликни кучайтириш, академик алмашинув дастурларини йўлга қўйиш бўйича келишиб олинди.
Ахборот хизмати