«ИННОПРОМ. Марказий Осиё» олтинчи Халқаро саноат кўргазмаси

Ўзбекистон Республикаси Инвестициялар, саноат ва савдо вазири Лазиз Кудратов бугун пойтахтимизда старт олган «ИННОПРОМ. Марказий Осиё» олтинчи халқаро саноат кўргазмасининг асосий ялпи мажлисида иштирок этди. Тадбирда делегациялар таркибида Россия Федерацияси Ҳукумати Раисининг биринчи ўринбосари Денис Мантуров, Ўзбекистон Республикаси Бош вазирининг ўринбосари Жамшид Ходжаев, Беларус Республикаси Бош вазирининг ўринбосари Виктор Каранкевич, Қозоғистон Республикаси Саноат ва қурилиш вазири Ерайин Нагаспаев, Тожикистон Республикаси Саноат ва янги технологиялар вазири Шерали Кабир ҳамда Евросиё иқтисодий комиссиясининг саноат ва агросаноат мажмуаси бўйича вазири Гоар Барсегян қатнашдилар.

Форумнинг асосий муҳокама мавзуси янги технологик хабларни шакллантириш ҳамда Евросиё саноат қиёфасини трансформация қилиш масалаларига бағишланди.

Жамшид Ходжаев ўз нутқида Президент Шавкат Мирзиёев раҳбарлигида Ўзбекистон индустриялаштириш йўлини изчил давом эттираётганини алоҳида қайд этди. Бугунги кунда мамлакат ялпи ички маҳсулотида саноатнинг улуши 27 фоизга етди, жорий йил якунларига кўра эса иқтисодий ўсиш 6,8 фоиз даражасида бўлиши прогноз қилинмоқда.

Минтақавий ҳамкорликдаги ютуқларга алоҳида эътибор қаратилди. 2025 йил якунлари бўйича Ўзбекистоннинг Марказий Осиёдаги шериклари ва Россия билан товар айлланмаси қарийб 22 миллиард долларни ташкил этди. Ҳозирги вақтда 5,5 мингта қўшма корхона фаолият юритмоқда, турли соҳаларда эса қиймати 47 миллиард доллардан зиёд бўлган 330 дан ортиқ лойиҳа амалга оширилмоқда.

Машинасозлик, кимё саноати ва янги авлод энергетикаси стратегик устувор йўналишлар сифатида белгилаб олинди. Республика хомашё моделидан юқори қўшилган қийматга эга маҳсулотлар ишлаб чиқариш ва барқарор ишлаб чиқариш занжирларини яратишга ўтмоқда.

Маълумот учун: кўргазма 22 апрелга қадар давом этади.

18 000 квадрат метр майдонда Ўзбекистон, Россия, Беларус, Хитой ва Қозоғистоннинг 350 га яқин компанияси ўз ечимларини тақдим этмоқда. Экспозиция шаҳар инфратузилмаси ва транспортдан тортиб, мураккаб саноат ускуналари ва автоматлаштириш тизимларигача бўлган кенг кўламли технологияларни қамраб олган.

Тадбир дастури рақамлаштириш, сунъий интеллект, экология, логистика, энергетика ва кадрлар тайёрлашга бағишланган 13 та сессияни ўз ичига олади. Тадбирда дунёнинг 30 та давлатидан, жумладан Ўзбекистон, Россия, Озарбайжон, Афғонистон, Беларус, Гана, Германия, Эрон, Қозоғистон, Канада, Қатар, Қирғизистон, Хитой, Латвия, Нигерия, Нидерландия, БАА, АҚШ, Саудия Арабистони, Тожикистон ва Туркия каби мамлакатлардан 1500 дан ортиқ компания ва делегатлар иштирок этиши кутилмоқда. Жами тадбирда 1500 дан ортиқ компания вакиллари иштирок этади.