Оила институтини мустаҳкамлаш ва хотин-қизларни қўллаб-қувватлаш масалалари муҳокама қилинди

Йиғилишда Андижон вилоят ҳокими Шухратбек Абдураҳмонов, ҳуқуқни муҳофаза қилувчи органлар раҳбарлари ва уларнинг ўринбосарлари, масъул ташкилотлар ҳамда оммавий ахборот воситалари вакиллари иштирок этди.

Муҳокамалар давомида эрта никоҳларнинг олдини олиш, никоҳни қонуний расмийлаштирмасдан турмуш қуриш ҳолатларига барҳам бериш, ажрим ёқасидаги оилаларни қўллаб-қувватлаш ва яраштириш, шунингдек, тўй ва бошқа оилавий маросимларни камхарж ва ихчам тарзда ўтказиш масалаларига алоҳида эътибор қаратилди.

Шунингдек, Ўзбекистон Республикаси Президентининг 2026 йил 3 мартдаги ПФ-33-сон Фармони мазмун-моҳиятини кенг тарғиб қилиш, унда белгиланган устувор вазифаларни жойларда тизимли амалга ошириш, хотин-қизларни қўллаб-қувватлаш, уларнинг ҳуқуқ ва манфаатларини ҳимоя қилиш ҳамда оилаларни мустаҳкамлаш борасидаги ишларни янада кучайтириш зарурлиги таъкидланди.

Қабул қилинган қарорларга мувофиқ, Андижон вилоятида ҳафтанинг ҳар жума куни “Оила куни” этиб белгиланди. Мазкур кунда мутасаддилар ҳудудлардаги ФҲДЁ бўлимларида аҳоли билан учрашиб, уларнинг мурожаатларини жойида кўриб чиқиш ва муаммоларига амалий ечим топиш чораларини кўради.

Йиғилиш якунида вилоят раҳбари томонидан барча мутасаддиларга белгиланган вазифалар ижросини таъминлаш юзасидан аниқ топшириқлар берилди.