Жорий йилнинг 29 ноябрь куни Тошкент шаҳридаги Inha университетида Бирлашган Миллатлар Ташкилоти Тараққиёт Дастури (UNDP) томонидан STEM таълими ва хотин-қизлар учун касбларга бағишланган тадбир бўлиб ўтди
2023-11-29 19:20:00 / Вазирлик янгиликлари
БМТТД Ўзбекистонда STEM соҳасида хотин-қизларнинг имкониятларини кенгайтириш бўйича қатор лойиҳаларни амалга оширади. Тадбирда БМТ Тараққиёт Дастурининг Ўзбекистондаги лабораторияси гендер тенглиги лойиҳаси доирасида тайёрланган тадқиқот натижаларини тақдим этди. Тошкент шаҳри, Фарғона, Андижон ва Сурхондарё вилоятларида ўтказилган тадқиқотлардан мақсад қизлар ва аёлларнинг STEM таълим ва касб-ҳунарларини танлашига ижобий таъсир этувчи омилларни аниқлашдан иборат.
Ш.Турдикулова тадбир иштирокчи-қизларига мотивацион нутқ билан мурожаат қилди:
– Таълим олинг, ўз устингизда ишланг ва ривожланинг. Бу кўникмаларни сиздан ҳеч ким олиб қўя олмайди. Олдингизга аниқ мақсад қўйсангиз қийинчиликлардан ўтиб олишингиз ҳам осон бўлади. Лавозим, мансаб бизга вақтинча берилади. Лекин илм доимо биз билан қолади. Шундай экан, сизга берилаётган барча имкониятлардан тўла-тўкис фойдаланинг ва ҳеч нарсадан қўрқманг.