Ўзбекистон Республикаси Олий таълим, фан ва инновациялар вазирлиги

Халқаро анжуманда Европа Иттифоқининг Қозоғистон ва Ўзбекистондаги ваколатхоналари масъуллари, «Promhouse» лойиҳаси ҳамкор давлатларининг ихтисослашган вазирлик ва идоралари вакиллари, соҳа мутахассислари, экспертлар иштирок этди.

Тадбирни Ўзбекистон Олий таълим, фан ва инновация вазирлиги Профессионал таълим тизимини ривожлантириш департаменти раҳбари Ўткир Алижонов кириш сўзи билан очиб, лойиҳа қатнашчилари ва конференцияга ташриф буюрганларни қутлади ва вазирлик бу лойиҳага муносиб ҳисса қўшганидан мамнунлигини билдирди.

Анжуманда 2020–2023 йиллар давомида қилинган ишлар сарҳисоб қилинди. Қайд этилганидек, лойиҳанинг асосий ютуғи касб-ҳунар таълими соҳасига янги мутахассисликларни жорий этишдир. Жумладан, Қозоғистонда кўчмас мулк бошқарувчиси касби ҳамда кўп квартирали уй бошқарувчиси ва уй устаси мутахассисликлари, Ўзбекистонда эса кўчмас мулк менежери ва уй устаси (Ҳоусе Мастер) касблари учун стандартлар яратилиб, профессионал таълим муассасаларида ушбу касблар бўйича ёшлар ўқитила бошланди.

Лойиҳа давомида “Training of Trainers” (ТоТ) таълим дастури амалга оширилди. У 256 академик соатга мўлжалланган бўлиб, ўқитувчилар 9 та мамлакат Германия, Қозоғистон, Ўзбекистон, Молдова, Беларус, Украина, Латвия, Литва ва Эстониядан жалб қилинди. Дастурда лойиҳанинг ҳамкор мамлакатлари уй-жой хўжалигининг 1300 га яқин мутахассислари иштирок этди. Тренинг “уй-жойларни бошқариш”, «рақамлаштириш», “турар-жой биноларида энергия самарадорлиги”, “уй устаси”, “касбий тайёргарликни ташкил этиш”, «коммуникация» модуллар бўйича ўтказилди.

Лойиҳанинг кўплаб иштирокчилари минтақавий тажриба алмашишни (3 та конференция, Қозоғистон ва Ўзбекистонга 2 та таълим сафари, Германия ва Эстонияга 2 та таълим сафари) ижобий эътироф этди. Лойиҳа уй-жой соҳасида тажриба алмашиш Марказий Осиё учун қанчалик муҳимлигини кўрсатгани алоҳида таъкидланди.

“Бугунги кунда уй-жой қурилиши билан боғлиқ муаммолар кўп қаватли уйларни профессионал бошқариш, уй-жойларни модернизация қилиш, биноларнинг энергия самарадорлигини ошириш, мутахассисларни тайёрлаш-минтақадаги барча мамлакатларнинг саъй-ҳаракатларини бирлаштириш орқали самарали бартараф этилиши мумкин", – дейди Сакен Маҳамбетов, «Shanirak» БВТ раиси (Остона).

“Promhouse каби Европа лойиҳалари кўпроқ бўлиши керак. Европа Иттифоқи лойиҳаси шерикларга нафақат Германиядан, балки 90 йилларда Уй-жой фондида Ўзбекистондагига ўхшаш бошланғич вазиятга эга бўлган Европа иттифоқи ва Шарқий Европанинг кўплаб мамлакатларидан уй-жойларни бошқариш бўйича тажриба ва ноу-хауларни ўзлаштириш имкониятини яратди. Бу биз учун жуда қимматлидир. Лойиҳа бизга уй-жойни бошқариш соҳасини профессионаллаштиришга ёрдам берди”, – Раҳима Ортиқова, Uyushma.uz раҳбари (Тошкент шаҳри).