Ўзбекистон Республикаси Олий таълим, фан ва инновациялар вазирлиги

Тадбирда Франция ва Ўзбекистон олий таълим муассасалари ўртасида икки томонлама учрашувлар бўлиб ўтди. Шунингдек, Ўзбекистон Республикаси Олий таълим, фан ва инновациялар вазирлиги, Франция элчихонаси ҳамда Эрасмус+таълим дастури вакилларининг нутқи тингланди.

– Франция ва Ўзбекистон ўртасида олий ва профессионал таълим соҳасида ҳамкорлик кенгаймоқда, – деди Франциянинг Ўзбекистондаги элчихонаси маданият ва ҳамкорлик бўйича маслаҳатчиси Лоран Ориол. – Бугун ташкил этилган мазкур тадбир расмий ташрифнинг мантиқий давомидир. Икки давлат ўртасида таълим йўналишида мустаҳкам ҳамкорлик бор ва бугун икки томон олий таълим муассасалари вакиллари ўзаро учрашиб, келгуси ҳамкорлик бўйича келишиб олишди.

Давра суҳбатида университетлараро ҳамкорликни янада ривожлантириш, академик алмашинувларни фаоллаштириш, ўзаро манфаатли йўналишларда қўшма илмий лойиҳалар ва қўшма таълим дастурларини амалга ошириш каби масалалар муҳокама қилинди.

Икки давлат ўртасида турли йилларда имзоланган 27 шартнома ва меморандумлар асосида республикамизнинг 18 та олий ўқув юрти билан Франциянинг 22 та таълим ташкилоти ўртасида ҳамкорлик йўлга қўйилган. Бугунги кунда Ўзбекистоннинг 9 та олий таълим муассасасида француз тили асосий тил сифатида ўқитилаётган бўлса, Республика миқёсида ушбу тилни биринчи ва иккинчи хорижий тил сифатида 15 мингдан ортиқ талаба-ёшлар ўрганмоқда.

Ўзбекистон Давлат Жаҳон тиллари университети проректори Абдураҳим Носиров Франциянинг Версал академияси, Сергй-Понтоисе универститети каби олий таълим муассасалари билан ҳамкор лойиҳалар устида ишлар олиб борилаётгани ҳақида айтиб ўтди. – Ўтган йиллар давомида Ўзбекистон Давлат Жаҳон тиллари университетининг Франция олий таълим муассасалари билан ҳамкорлиги ортидан талабалар мобиллиги, ўқитувчиларнинг малака ошириш имкониятлари кенг йўлга қўйилди. Бугунги кунда ҳам университетимизда Франциядан келган ўқитувчилар француз тилида дарс бериши аҳамиятлидир. Бугунги тадбирда ҳамкорлигимиз янада кенгайши устида келишувларга эришдик, – деди A.Nosirov.

Айтиб ўтиш керакки, республика бўйича жами 15 мингдан ортиқ талаба француз тилини чет тили сифатида ўрганмоқда. Француз тили немис тили билан бир қаторда республикамиз таълим муассасаларида ўқитиладиган иккинчи тил (инглиз тилидан кейин) ҳисобланади. Давра суҳбатида бу борада алоқаларни янада мустаҳкамлашга эришилди.