Форум иштирокчиларини Олий таълим, фан ва инновациялар вазири Қўнғиротбой Шарипов қутлаб, мамлакатимизда қизларга муносиб шарт шароитлар яратиб бериш борасида  кенг кўламли ишлар амалга оширилаётганини таъкидлади. 

– Айниқса, таълим соҳасида хотин-қизларни ҳар томонлама қўллаб-қувватлашга алоҳида эътибор қаратилмоқда, - деди вазир. – Ҳозирда аёл-қизларнинг таълимдаги улуши ҳар қачонгидан юқори ва бу кўрсаткич йилдан-йилга ошиб бораётгани барчамизни қувонтиради. Қизларимизнинг таълим олишга, илмга ташналиги юртимиз келажаги пойдеворидир. Сизларнинг ҳар бирингиз илм-фан, санъат, маданият, иқтисодиёт  ва бошқа соҳаларга улкан ютуқларимиз нишонасидирсизлар.

2012-йилдан бери ҳар йилнинг 11-октябр куни Бирлашган Миллатлар Ташкилоти томонидан Халқаро қизлар куни этиб белгиланган. Бундан кўзланган мақсад қизларнинг таълим олиши, ижтимоий ва сиёсий ҳуқуқлардан, тиббий хизматдан фойдаланишига имкон бериш учун дунё аҳлининг саъй-ҳаракатларини бирлаштиришдир.
Бугунги кунда Республикамиздаги олий таълим муассасаларида жами талабалар сони 1 млн. 436 минг нафардан ошиб, шундан хотин-қизлар 747 мингни (52 фоизни) ташкил этади. Магистратура босқичида ўқишини давом эттираётган жами талабалар 36 минг 399 нафарни ташкил этиб, шундан талаба-қизлар сони 22 минг 822 нафар бўлиб, жами талабалар сонига нисбатан 62,70 фоизни ташкил этади.
Бу кўрсаткич магистратура босқичига ўқишга қабул қилинган талаба-қизларимизга контракт тўловларининг давлат томонидан тўлаб бериш амалиётининг йўлга қўйилиши сабабли йил сайин яхшиланиб бормоқда.
2023/2024 ўқув йилидан бошлаб, коллеж ва техникумларда қурилиш, транспорт, коммунал, қишлоқ хўжалиги ва хизмат кўрсатиш йўналишлар бўйича тўлов-контракт асосида ўқишга қабул қилинган хотин-қизлар тўлиқ давлат гранти асосида ўқишни бошлади.
Коллеж ва техникумларга ўқишга қабул қилинган хотин-қизлар учун талаб этиладиган давлат гранти маблағлари республика бюджетидан ажратилади.  Хотин-қизлар учун яратилган ушбу имконият аёллар кам фаолият юритаётган соҳаларда уларнинг улушини ошишига хизмат қилиши билан аҳамиятлидир. 
Ҳар йили эҳтиёжманд оилалар фарзанди бўлган 2 минг нафар хотин-қизларимиз давлат гранти асосида олий таълим муассасаларга ўқишга қабул қилиниб келинмоқда. 
Шу тариқа бугунга қадар қарийб 7 мингга яқин хотин-қизлар давлат гранти асосида олий таълим ўқишга қабул қилинди.
Мутахассислиги бўйича камида 5 йил меҳнат стажига, лекин олий маълумотга эга бўлмаган 500 нафар хотин-қизларимиз ҳар йили Оила ва хотин-қизлар давлат қўмитаси тавсияномаларига асосан тест синовлари натижаларига мувофиқ контракт асосида ўқишга қабул қилинмоқда. 
Давлат олий таълим муассасаларининг магистратура босқичида ўқиётган барча хотин-қизларнинг контракт тўловлари қоплаб берилиши ва бунга ҳар йили камида давлат бюджетидан 200 млрд. сўм ажратиб борилмоқда. 
Бугунги кунда, Давлат олий таълим муассасаларининг магистратура босқичида ўқиётган хотин-қизларнинг контракт тўловлари учун Давлат бюджетидан:
2022/2023 ўқув йилида 14 минг 110 нафар талаба хотин-қизларга 152,9 млрд. сўм маблағ;
2023/2024 ўқув йилида 5 минг 991 нафар талаба хотин-қизларга 60,3 млрд. сўм маблағ Давлат бюджети ҳисобидан тўлаб берилган.
Мазкур ўқув йилида хам бу амалиёт давом этади.
2023-2024-йилларда олий таълимдан кейинги таълим институтларига стажёр-тадқиқотчилар ва докторантурада таҳсил олаётган тадқиқотчилар 11.092 нафар бўлиб, шундан хотин-қизлар 5.831 нафар (52 %) ни ташкил этади.

Шунингдек, вазирлик томонидан хотин-қизларни илм-фанга кенг жалб қилиш, хотин-қизларнинг янги ғоя ва ишланмаларини ҳар томонлама қўллаб-қувватлаш ва рағбатлантириш учун илмий фаолиятга оид давлат дастурлари доирасида мунтазам равишда илмий жамоада ёш олималар, иқтидорли талаба-магистрлардан иборат бўлган "Олима аёллар грантлари" ташаббускор амалий ва инноватсион лойиҳалар танловлари эълон қилиниб келинмоқда.