Форум доирасида Италия Университетлар ва тадқиқотлар вазири Анна Мариа Бернини бошчилигидаги делегация Тошкент шаҳридаги Пиза университети фаолияти билан танишди.
2024-09-24 20:30:00 / Вазирлик янгиликлари
Делегация аъзоларига ўқув ва лаборатория хоналари, талабалар учун яратилган шароитлар ҳақида батафсил маълумот берилди.
Таъкидланганидек, Тошкент шаҳридаги Пиза университети 2021 йилда ташкил этилган бўлиб, ҳозирда геология йўналиши бўйича 155 нафар талаба таҳсил олади. Университетда замонавий асбоб-ускуналар билан жиҳозланган ва халқаро аккредитациядан ўтган кимё ва физика лабораториялари, минералогия, петрография ва нефть-газ геологияси йўналишларини ўз ичига олган геология фанлари лабораторияси, рус, ўзбек ва инглиз тилларида 2 мингдан ортиқ китоб фондига эга кутубхона, хорижий тилларни ўрганиш учун лингафон ўқув хоналари мавжуд.
Учрашув давомида шунингдек, истиқболдаги режалар муҳокама қилинди. Жумладан, бакалавриат таълим йўналишлари ва магистратура мутахассисликлари бўйича янги йўналишларни очиш, халқаро лойиҳаларда ҳамкорликда иштирок этиш, профессор-ўқитувчилар малакасини ошириш кабилар алоҳида мунозара мавзуси бўлди.