Вазир Қорақалпоғистондаги олийгоҳлар раҳбарлари билан учрашди
2024-08-20 10:00:00 / Вазирлик янгиликлари
19 август куни Олий таълим, фан ва инновациялар вазири Қўнғиротбой Шарипов Қорақалпоғистон Республикасига хизмат сафари давомида Бердақ номидаги Қорақалпоқ давлат университетида бўлиб, бу ерда ҳудуддаги олий таълим муассасалари раҳбарлари билан йиғилиш ўтказди.
Дастлаб вазир Қ.Шарипов сўзга чиқиб, юртимизда сўнгги йилларда таълим соҳасига кўрсатилаётган эътибор натижасида соҳанинг моддий-техник базаси мустаҳкамланиши, шунингдек, ўқитувчилар ва устозларга муносиб меҳнат шароитларини яратишга алоҳида эътибор қаратилаётганини таъкидлади.
Шундан сўнг, олий таълим муассасалари раҳбарларининг янги ўқув йилини юқори даражада бошлаш, ўқув жараёнини тўғри ташкил этиш, талабаларни турар жой билан таъминлаш борасидаги ахборотлари тингланди. Вазир янги ўқув йилига тайёргарлик кўришда, таълим сифатини таъминлашда йўл қўйилаётган камчиликларга ҳам тўхталиб, амалга оширилиши зарур бўлган вазифалар бўйича қатор топшириқлар берди.