Ўзбекистон Республикаси Олий таълим, фан ва инновациялар вазирлиги

Дастлаб вазир марказ шароити билан танишиб, имконияти чекланган ёшлар эришган ютуқлар кўргазмасини кўздан кечирди. Ўзбекистон-Беларус қўшма амалий-техник квалификациялари институти ихтирочи талабалари томонидан ишлаб чиқилган имо-ишора тилида гапирадиган шахсларнинг малакасини интернетдан фойдаланган ҳолда ошириш имконини берадиган ахборот тизими, улар ўзаро мулоқот қилишлари учун имо-ишора тилини матнга ва матнни имо-ишора тилига ўгириб берадиган дастур ҳамда кўзи ожизлар учун махсус яратилган Брайл алифбосидаги маълумотни электрон тарзда кўрсатиб берадиган қурилма лойиҳалари билан танишди. Лойиҳалар бўйича фикр алмашилиб, уларни молиялаштириш бўйича масъулларга кўрсатмалар берилди.

Эшитиши ва нутқида нуқсони бўлганлар билан учрашув давомида вазир ижтимоий ҳимояга муҳтож ҳар бир инсон жамиятда ўз ўрни ва қадрига эга эканлигини айтиб, бу борада кўплаб амалий ишлар қилингани ва яна ҳал қилиниши керак бўлган масалаларга тўхталди.

Карлар жамияти раиси G.Shodiyeva сўнгги йилларда имо-ишора тили таржимонлари ва янги соҳалар бўйича педагогларни тайёрлашга катта эҳтиёж борлигини таъкидлади. Шу жиҳатдан кўмак берилса, салоҳиятли кадрлар, жамият ва халққа фойдаси тегадиган мутахассислар етишиб чиқади. Бунинг натижасида эшитиши ва гапиришида нуқсони бўлган шахсларнинг билим ва ахборотларни олиш, фикрини кенг жамоатчиликка етказиш имконияти кенгаяди, уларнинг ҳаёт сифати яхшиланади.

Вазир бу таклиф юзасидан ҳозирда барча давлат олий таълим муассасаларида эшитиш ва сўзлашда нуқсони бор шахслар учун таржимон ва педагоглар тайёрлайдиган курслар фаолияти йўлга қўйилганини ва улар қисқа муддатларда турли соҳалар учун сифатли кадр тайёрлаб беришини қайд этди. Шунингдек, маданий ёдгорликлар мавжуд шаҳарларда юртимизга ташриф буюрган меҳмонларни тарихимиз билан таништирадиган сурдо-гидларга эҳтиёж борлиги айтилиб, бундай курсларга ёшлар таклиф этилди.

Қатнашчиларни қийнаб келаётган масалалар, олий таълим муассасаларида учрайдиган улар билан боғлиқ муаммолар, сурдопедагогика бўйича ечимини кутаётган саволлар ва фикрлар тингланди. Уларнинг ечими бўйича таклифларни ишлаб чиқиш, хусусан, нутқида нуқсони бўлган ОТМ битирувчиларини турли илмий ва амалий лойиҳаларга жалб қилиш, махсус мактабларда сурдо-педагог сифатида ишга жойлаш ва уларни имтиёз асосида магистратурага қабул қилиш юзасидан тегишли ташкилий масалалар юзасидан кўрсатмалар берилди.

“Ногиронлиги бўлган шахсларни ҳар томонлама қўллаб-қувватлаш ва жамиятда фаоллигини оширишга барчамиз бирдек масъулмиз, – деди вазир.

Тадбир якунида Олий таълим, фан ва инновациялар вазири томонидан иқтидорли ёшларни ўқитиш учун Инновацияларни жорий қилиш ва технологиялар трансфери Миллий офисида ташкил этилган “Келажак касблари” ўқув дастурида қатнашиш учун сертификатлар ҳамда эсдалик совғалари тақдим этилди.