Ўзбекистон Республикаси Олий таълим, фан ва инновациялар вазирлиги

2024/2025 ўқув йили учун 332 та касб-ҳунар мактабларига маҳаллий ҳокимликлар томонидан ҳудудларнинг ижтимоий-иқтисодий ривожланиш дастурлари асосида маҳаллий меҳнат бозори эҳтиёжлари ҳамда иш берувчиларнинг буюртмаларидан келиб чиқиб берган таклифлари асосида 112 та касб ва мутахассисликлар бўйича 120 мингдан ортиқ 9-синф битирувчиларини қабул қилиш режалаштирилмоқда.

Шундан, кундузги таълим шакли бўйича 110 мингта ҳамда дуал таълим шакли бўйича 14 мингта қабул режаси кўзда тутилган.

Хусусан, қабул параметрларида меҳнат бозорининг муҳандислик иши, ишлаб чиқариш ва ишлов бериш, ахборот-коммуникация технологиялари, қишлоқ хўжалиги, хизмат кўрсатиш, архитектура ва қурилиш каби соҳалари бўйича ўрта бўғин кадрларга бўлган эҳтиёжлар инобатга олинган.

Касб-ҳунар мактабларига 9-синф битирувчиларининг ҳужжатларини қабул қилиш жараёни ҳар йили 1 июлдан 20 июлга (шу куни ҳам) қадар kasb.edu.uz электрон платформаси қабул қилинади.

Ўқувчилар белгиланган тартибда кириш имтиҳонлари орқали сараланиб, давлат бюджети асосида ўқитилади.

Коллеж ва техникумларга 2024/2025 ўқув йили учун вазирлик ва идоралар ҳамда бириктирилган олий таълим муассасаларининг таклифлари асосида жами 110 мингдан ортиқ қабул режасини белгилаш режалаштирилган.

Касб ва мутахассислик эгаллаш истагида бўлган ёшларни қўллаб-қувватлаш мақсадида 45 мингдан ортиқ ўрин давлат гранти асосида ажратилади.

Давлатимиз раҳбари томонидан жорий йилнинг 5 февраль куни ижтимоий соҳадаги устувор вазифалар муҳокамаси юзасидан ўтказилган видеоселектор йиғилишида профессионал таълим тизимида ўрта бўғин кадрларини тайёрлашни тизимли йўлга қўйиш, улардаги қувватларни 100 фоизга ишлатиш ҳамда дуал таълим билан қамровни 50 минг нафарга етказиш бўйича келгусидаги вазифалар белгилаб берилди.

Қайд этиш жоизки, бугунги кунда 234 та профессионал таълим муассасасида 15 минг нафар ўқувчини дуал таълим шакли бўйича ўқитиш йўлга қўйилган. Профессионал таълим муассасалари ҳамда корхона (ташкилот)лар ўртасида эса, 3 603 та шартнома имзоланган бўлиб, улар томонидан жами 3 144 нафар мутахассис “Устоз” сифатида бириктирилган.

Иш берувчилар билан ҳамкорликда дуал таълим қамровини ошириш мақсадида Бухоро, Андижон ва Фарғона вилоятларида  “Дуал таълим – ишлаб чиқариш ва таълим ўртасидаги мувозанат” мавзусида форумлар ташкил этилди. Мазкур Форумларда 250 дан ортиқ иш берувчи корхона ва ташкилотлар иштирок этиб, улар билан 3000 нафар ўқувчини дуал таълим шаклида ўқишга қабул қилишга келишиб олинди.

Шунингдек, Вазирликнинг ҳудудий бошқармалари ва 6 726 та маҳалладаги ҳоким ёрдамчилари ва ёшлар етакчиси билан ҳамкорликда ишсиз фуқароларни коллеж ва техникумларга дуал таълим шаклида ўқишга жалб қилиш мақсадида 2024 йилнинг апрел-июнь ойлари учун тарғибот ва ташвиқот ишлари режа-графиги шакллантирилди. Тадбирлар давомида 1 953 та маҳалладаги ҳоким ёрдамчилари ва ёшлар етакчиси билан ҳамкорликда 15 минг нафар ишсиз фуқароларни коллеж ва техникумларга дуал таълим шаклида ўқишга жалб қилиш бўйича ишлар амалга оширилмоқда.

Ёшларни касб эгаллашга бўлган қизиқишини ошириш ва уларни иқтидорини рўёбга чиқариш мақсадида умумтаълим мактабларида «Касб ва ёшлар» тадбирлари ўтказилиб, 7 мингга яқин умумий ўрта таълим мактабларининг 500 минг нафардан ортиқ 7-11-синф ўқувчилари қамраб олинди.