Ўзбекистон ва Хитой ҳукуматлари Илм-фан ва технологиялар қуйи қўмитасининг навбатдаги 6 йиғилиши ўтказилди
2024-04-24 16:40:00 / Вазирлик янгиликлари
Жорий йилнинг 24 апрель куни Ўзбекистон ва Хитой ҳукуматлари Илм-фан ва технологиялар қуйи қўмитасининг навбатдаги 6 йиғилиши бўлиб ўтди. Йиғилишга Ўзбекистон Республикаси Олий таълим, фан ва инновациялар вазири ўринбосари Отабек Маҳкамов ва Хитой Халқ Республикаси фан ва техника вазири ўринбосари Чен Сзячан ҳамраислик қилди.
Йиғилишда Ўзбекистон ва Хитой ўртасида кенг ривожланиб бораётган ҳамкорлик алоқалари ва давлатлар ўртасида илм-фан, инновациялар соҳасида эришилган ютуқлар ҳамда келгусида амалга оширилиши кўзда тутилган амалий ишлар муҳокама қилинди.
Шунингдек учрашувда 2021 йилда ўтказилган Ўзбекистон ва Хитой ҳукуматлари Илм-фан ва технологиялар қуйи қўмитасининг 5-йиғилиши якунлари бўйича икки мамлакат томонидан амалга оширилган ишлар ва эришилган ютуқлар эътироф этилиб, ҳамкорликнинг юқори даражада ривожланиши икки мамлакат олимлари ва мутасаддиларининг катта ютуқлари эканлиги айтилиб ўтилди.
Учрашув сўнгида Ўзбекистон ва Хитой ўртасида илм-фан ва технологиялар соҳасида келгуси икки йиллик ҳамкорлик йўналишлари белгилаб олинди.