Агентлик мудофаа саноати корхоналари фаолиятини тартибга солиш ва уларни ривожлантириш соҳасида давлат сиёсатини амалга ошириш бўйича ягона давлат бошқаруви органи ҳисобланади (2023-йил 31-январдаги ПФ-16-сон қарор).

Ҳарбий ва икки мақсадга мўлжалланган маҳсулотларни ишлаб чиқиш, ишлаб чиқариш, таъмирлаш ва сотиш соҳасидаги фаолиятни лицензиялашни амалга оширади.

Агентлик вазифалари:

мудофаа аҳамиятидаги корхоналар фаолиятини тартибга солиш
ва ривожлантириш;

ҳарбий ва икки мақсадга мўлжалланган маҳсулотларни янги турларини ишлаб чиқаришни ташкил этиш;

миллий армиямизни мудофаа саноати корхоналарида ишлаб чиқариладиган ҳарбий ва икки мақсадга мўлжалланган маҳсулотлар билан таъминлашни ташкил этиш;

ҳарбий-техникавий ҳамкорликни кенгайтириш ва ривожлантириш, соҳага инвестицияларни жалб этиш, шунингдек, маҳсулот экспортини ташкил этиш;

ҳарбий ва икки мақсадга мўлжалланган маҳсулотлар ишлаб чиқаришни ўзлаштиришга қаратилган илмий-тадқиқот ва тажриба-конструкторлик ишларини ташкил этиш ва олиб бориш.

Агентлик тасарруфига 5 корхона (“Восток”, “ЧАТЗ”, “ИТМ”, “Ремтех”, “Барер”) киради, шунингдек, иқтисодиёт тармоқларига оид 20 дан ортиқ корхоналар (“Ўзелектроаппарат”, “Крантас”, “АКСУМ”, “Винлад”, “ЖНС Лабс”, “Узwоолентех”, ОКМК, НКМК, “Ўзметкомбинат” ва б.) ҳарбий ва икки мақсадга мўлжалланган маҳсулотларни ишлаб чиқиш, ишлаб чиқариш, қурол ва ҳарбий техникани таъмирлаш, модернизация қилиш хизматларини кўрсатиш фаолияти билан шуғулланади.

Мазкур корхоналарда 2 000 га яқин ишчи ходимлар иш билан таъминлаган ҳолда (оддий ишчи ходимлардан то конструктор ва дастурчиларгача) 300 дан ортиқ маҳсулот ишлаб чиқарилиб, 70 номланишдаги хизмат турлари кўрсатиб келинмоқда.

Агентликнинг стратегияси:

мудофаа аҳамиятидаги корхоналарнинг инновацион ва барқарор ривожланиши;

мудофаа саноати соҳасида технологик мустақилликни таъминлаш;

мудофаа саноати корхоналарини босқичма-босқич диверсификация қилиш.