Tashkent wálayatında reformalar nátiyjeliligi hám tiykarǵı wazıypalar dodalandı

Mámleketimiz basshısı Tashkent wálayatı paytaxtqa jaqın jaylasqanı ushın aymaq xalqı jumıs orınları, dáramat hám turmıs sharayatı da Tashkent qalası dárejesinde bolıwın kútetuǵının atap ótti. Sonlıqtan, wálayat isbilermenlik hám biznes ortalıǵın jaqsılaw, sanaat, xızmet kórsetiw hám awıl xojalıǵın rawajlandırıw baǵdarında úlgi bolıwı kerek ekenligi kórsetip ótildi.

Sońǵı jıllarda aymaqta keń kólemli jumıslar ámelge asırıldı. Atap aytqanda, 2024-2025-jıllarda wálayat ushın 23 qarar qabıl etilip, olardıń sheńberinde byudjet, bank kreditleri hám sırt el investiciyaları esabınan iri resurslar qaratıldı. Usı dáwirde 14 jańa sanaat zonası shólkemlestirildi, 115 investiciyalıq joybar ámelge asırıldı, 237 jańa eksportyorlar payda boldı hám 300 mıńnan aslam jańa jumıs ornı jaratıldı.

Ótken bir jıl ishinde Parkent, Ohangaron hám Almalıqta elektrotexnika, metallurgiya, farmacevtika, toqımashılıq, mashina qurılısı hám taw-kán tarawlarında iri joybarlar iske qosıldı. Paytaxt ekologiyasına unamsız tásir etip atırǵan 87 kárxana hám jańa sanaat joybarların Tashkent wálayatına kóshiriw jumısları baslandı, házirge shekem 15 ten aslam toqımashılıq kárxanası kóship keldi hám 4700 puqara óz jasaw ornında jumıslı boldı.

Ulıwma, 2025-jılı wálayattıń jalpı aymaqlıq ónimi kólemi 7,1 procentke, sanaat ónimlerin islep shıǵarıw 6,6 procentke, awıl xojalıǵı 4,2 procentke, xızmetler tarawı 15,2 procentke, qurılısta jumıstı bólip alıp islew jumısları kólemi 9,8 procentke ósti.

2026-jılı wálayat ekonomikasın 9,1 procentke, sanaattı 8,8 procentke, xızmetlerdi 17,2 procentke, qurılıs jumısların 15 procentke hám awıl xojalıǵın 6,6 procentke arttırıw rejelestirilgen. Onıń ushın 6,2 milliard dollar investiciya tartıw hám 2,8 milliard dollar eksporttı támiyinlew mólsherlengen.

Bunnan bılay rayonlardıń potencialın jasalma intellekt járdeminde tallap, sanaat, investiciya hám eksport boyınsha jańa imkaniyatlardı anıqlaw zárúr ekenligi atap ótildi. Bul jumıslardıń nátiyjesin jáne de arttırıw ushın wálayatta Sanlı rawajlanıw – jasalma intellekt orayın ashıw usınısı qollap-quwatlandı.

Wálayatta sanaattı basqarıw boyınsha jańa sistema engizilip atırǵanı, hákimniń sanaat máseleleri boyınsha orınbasarına investiciya hám eksporttı kóbeytiw, tayar hám yarım tayar ónimlerdiń úlesin arttırıw boyınsha anıq nátiyjelilik kórsetkishleri belgileniwi málim etildi.

Usı jılı 883 máhálleni kámbaǵallıq hám jumıssızlıqtan jıraq aymaqqa aylandırıw, 84,7 mıń xalıqtı turaqlı jumısqa jaylastırıw, 37 mıń rásmiy emes jumıs ornın legallastırıw hám 13,3 mıń jumıssız puqaranı kásipke oqıtıw wazıypası qoyıldı.

Sanaattaǵı qosımsha ósiw derekleri sıpatında bir qatar jańa joybarlar kórsetip ótildi. Sonıń ishinde, Angren qalasında keramika hám keramogranit plitka islep shıǵarıw, Yangiywl rayonında “Tınıshlıq” kishi sanaat zonası, Parkent rayonında “Parkent Pharm” erkin ekonomikalıq zonası, Orta Shırshıq rayonında mebel soǵıwǵa qánigelesken klaster, zamarrıq jetistiriw hám mazalı mákke islep shıǵarıw, Yangiywlda túrkiyalı investor qatnasıwında balıqshılıq kompleksi, Nurafshon qalasında toqımashılıq hám trikotaj ónimlerin islep shıǵarıw joybarları ámelge asırılıp atırǵanı atap ótildi.

Májiliste awıl xojalıǵı hám azıq-awqat qáwipsizligi máselelerine de ayrıqsha toqtap ótildi.

Atap ótilgenindey, sharwa hám qus góshin jetistiriw kólemi elege shekem paytaxt hám wálayattıń mútájliklerin támiyinlew ushın jeterli emes. Sonlıqtan, Ohangaron rayonında sharwashılıqtı rawajlandırıw hám ot-jem bazasın keńeytiw boyınsha ayrıqsha baǵdarlama ámelge asırıladı.

Bul jerde Qoy hám eshki jetistiriw ilimiy-óndirislik orayın shólkemlestirip, 50 mıń bas násilli qoy hám eshki alıp keliw rejelestirilgen. Ohangaron toǵay xojalıǵı balansındaǵı toǵay menen qaplanbaǵan 60 mıń gektar jaylawdı aukcion arqalı ajıratıw mexanizmi engiziledi.

Ulıwma, 2026-jılı 2,1 trillion sumlıq 78 sharwashılıq joybarı ámelge asırılıp, 496 jańa jumıs ornı jaratıladı. Sonday-aq, 35 mıń gektarda suwdı únemleytuǵın texnologiyalardı engiziw, jańa jerlerdi ózlestiriw, baǵ hám júzimzarlar qurıw rejelestirilgen.

Qusshılıqtı rawajlandırıw boyınsha Oqqwrǵon hám Ohangaron rayonlarında jılına 30 mıń tonna qus góshin jetistiriw quwatlılıǵına iye, bahası 45 million dollarlıq joybarlar ámelge asırıladı. Atap ótilgenindey, piyaz hám chesnoktan gektarınan alınatuǵın dáramat ǵálleden bir neshe on esege joqarı. Sonıń ushın Ahangaranda ǵálle maydanların joqarı dáramatlı eginlerge basqıshpa-basqısh ótkeriw usınısı maqullandı.

Qısqa waqıt ishinde Bostanlıqtaǵı “Amirsay” qısqı kurort kompleksi hám “Beldersoy resort” ornı xalıqaralıq dárejedegi turizm oraylarına aylanǵanı atap ótildi. Endi usınday joybarlardı Parkent, Ǵazalkent, Ohangaron hám Angrenniń tawlı aymaqlarında da ámelge asırıw múmkin ekenligi kórsetip ótildi. Máselen, Parkentte “Altın bel” shıńı hám oǵan tutas aymaqta miymanxana, “shale” usılındaǵı jaylar, dem alıw hám kewilashar komplekslerdi óz ishine alǵan taw-shańǵı kurort zonası, Ohangaron rayonında bolsa “Moviy toǵlar” dem alıw ortalıǵı negizinde zamanagóy turizm kompleksi shólkemlestiriledi.

Sonday-aq, Angren qalasınıń Lashkarak hám Yangiobod aymaqlarında “turizm awılları”, Bekabad rayonında ekologiyalıq hám ańshılıq turizmi, Parkent rayonında “Gúmis” turistlik kompleksi jáne Parkentsayda shańaraqlıq dem alıw orınları hám miyman úyleri shólkemlestiriw rejelestirilgen. Jaylastırıw qurallarınıń quwatlılıǵın 35,5 mıń orınǵa jetkeriw názerde tutılǵan.

Usı jumıslardıń esabınan wálayatta turizm eksportın 600 million dollarǵa, sırt el hám jergilikli turistlerdiń sanın 16,5 millionǵa jetkeriw wazıypası qoyıldı.

Májiliste wálayattıń “awır” kategoriyadaǵı hám “Jańa Ózbekstan kelbetindegi” rayon, qala hám máhállelerdegi 231 joybarǵa 956 milliard sum ajıratılǵanı atap ótildi. Máhállelerde turaq jay, elektr, suw, kanalizaciya hám jollardı jaqsılaw jumısların jedellestiriw wazıypası qoyıldı.

Atap aytqanda, ishimlik suwı barmaǵan 39 máhálle oraylasqan ishimlik suwı menen tolıq támiyinlenedi, jáne 81 máhálledegi 166,7 kilometr jaramsız suw tarmaǵı rekonstrukciyalanadı. Sonday-aq, 145 máhálledegi 121 eskirgen transformator jańalanıp, 443,6 kilometr elektr tarmaqları almastırıladı.

Májiliste iri sociallıq hám innovaciyalıq joybarlar da kórip shıǵıldı. Sonıń ishinde, Joqarı Shırshıq rayonında 400 gektar maydanda bahası 5 milliard dollar bolǵan “Tashkent Medical Smart City” xalıqaralıq innovaciyalıq medicina qalashasın qurıw rejesi dodalandı. Sonıń menen birge, Nurafshon qalasında 35,4 million dollarlıq Keleshek texnologiyaları orayın shólkemlestiriw, 100 den aslam sırt el IT kompaniyasın tartıw hám xızmetler eksportın jılına 20 million dollarǵa jetkeriw, 670 orınlıq kóp tarmaqlı medicina klasteri, sociallıq mákemeler orayı, wálayat mámleketlik arxiviniń imaratı sıyaqlı joybarlar dodalandı.

Bunnan tısqarı, xalıqtıń múrájatları menen islesiw, jámiyetlik qáwipsizlikti támiyinlew, “jasıl ekonomika” hám jaslarǵa baylanıslı siyasat baǵdarında alıp barılıp atırǵan jumıslar hám keleshektegi rejeler kórip shıǵıldı.

Májilis juwmaǵında Prezidentimiz juwapkerlerge wálayattıń reformalar shtabı menen birgelikte bar potencialdan tolıq paydalanıp, jańa jumıs orınların jaratıw, xalıqtıń dáramatların arttırıw hám turmıs sharayatın jaqsılawǵa qaratılǵan hár bir baǵdarlama hám joybardıń anıq nátiyje beriwin támiyinlew boyınsha tapsırmalar berdi. Tashkent wálayatın kámbaǵallıq hám jumıssızlıqtan jıraq aymaqqa aylandırıp, basqa aymaqlar ushın úlgi sıpatında juwapkerlerdiń jumısınıń eń áhmiyetli wazıypası bolıwı belgilendi.