Ekonomikada ósiw pátlerin saqlaw hám dawam ettiriw ilajları kórip shıǵıldı

Usı jıldıń birinshi eki ayında sanaat 7,7 procentke, xızmetler 15,4 procentke ósti, 3,5 milliard dollarlıq eksport ámelge asırıldı hám 8,3 milliard dollar sırt el investiciyası tartıldı.

Jıl basınan 9 wálayattı sociallıq-ekonomikalıq rawajlandırıwǵa respublikalıq byudjetten qosımsha 2,3 trillion sum hám 500 million dollar qarjı qaratıldı. “Jańa Ózbekstan kelbeti” statusı berilgen 33 rayon hám 330 máhálle ushın jergilikli byudjetlerge 3,9 trillion sum ajıratıldı. Awır kategoriyadaǵı 37 rayon hám 903 máhállege jámi 3,9 trillion sum jáne jergilikli byudjetlerden 1,3 trillion sum, 283 “drayver” joybarlarǵa birinshi basqıshta 1 trillion sum ajıratıldı.

Jıl sońına shekem ǵalabalıq kósheler, jaǵalıq hám jol boyı infrastruktura joybarların ámelge asırıw ushın jámi 1,2 trillion sum, turizm potencialı joqarı bolǵan 150 máhálle infrastrukturasın jaqsılaw ushın 450 milliard sum, 400 máhállede 50 mikro sanaat orayların shólkemlestiriw ushın 150 milliard sum qarjı qaratıladı.

Sonıń menen birge, qısqa waqıt ishinde dúnyadaǵı jaǵday keskin ózgerip, ekonomika tarmaqlarınıń turaqlılıǵı, sırtqı sawda jolları hám import bahalarına qosımsha basım júzege keltirip atırǵanı atap ótildi. Bunday sharayatta hár bir tarmaq hám aymaq basshısı jaǵdaydı aldınnan bahalap, hár qıylı scenariyler tiykarında proaktiv islewi zárúr ekenligi kórsetip ótildi.

Inflyaciyanı bıyılǵı jılı 6-6,5 procent sheńberinde saqlap qalıw eń áhmiyetli wazıypalardan biri ekenine ayrıqsha itibar qaratıldı.
Atap aytqanda, dúnya bazarında neft bahasınıń keskin qımbatlawı transport hám neft-ximiya ónimleriniń ózine túser bahasına tásir kórsetip atırǵanı, polietilen hám polipropilen bahalarında da ósiw baqlanıp atırǵanı aytıldı. Sol sebepli, tiykarǵı túrdegi azıq-awqat ónimleriniń importı, transport-logistika máseleleri hám alternativ koridorlardan paydalanıw boyınsha jedel ilajlar kóriw wazıypası qoyıldı.

Bunnan tısqarı, isbilermenlerdiń shiyki zat, bazar hám kredit penen baylanıslı mashqalaların házirden-aq sheshiw áhmiyetli ekenligi atap ótildi.

Eksportshılar tárepinen kóterilip atırǵan tiykarǵı máselelerden biri transport-logistika ekeni, dúnyada júz berip atırǵan waqıyalar tásirinde eksport júk tasıwlarında úzilisler hám qımbatlaw ayrıqsha qáweter oyatıp atırǵanı atap ótildi.

Usı múnásibet penen qońsı mámleketler menen transport hám sawda máseleleri boyınsha tıǵız birge islesiwdi kúsheytiw, azıq-awqat ónimlerin aviatransport arqalı eksport etiw hám isbilermenler ushın arzanlastırılǵan tariflerdi engiziw ilajların kóriw tapsırıldı.

Sırt el investiciyaları máselesi de hár tárepleme kórip shıǵıldı. Qáwipli xalıqaralıq jaǵday ayırım joybarlardıń orınlanıwına tásir kórsetiwi múmkin ekeni bildirildi. Usı múnásibet penen ámelge asırılıp atırǵan hár bir joybardı turaqlı tallap barıw hám investorlar menen kúnlik qarım-qatnas ornatıw wazıypası belgilendi.

Bank-qarjı tarawında biznesti qollap-quwatlaw ushın ajıratılıp atırǵan kreditlerdiń dinamikası da kórip shıǵıldı.

Mámleketimiz basshısı házirgi sanlar unamlı bolıwına qaramastan, hesh bir basshı qátirjám bolıwı múmkin emes ekenligin atap ótti. Házirgi qıyın jaǵdayda qáwip-qáterlerdi aldınnan kóre biliw, olardı jumsartıw boyınsha anıq rejeler menen islesiw, tarmaqlar hám aymaqlarda mashqalalardı kútip otırmastan, olarǵa jedel sheshim tabıw zárúr ekenligi kórsetip ótildi.

Juwapkerlerge inflyaciyanı jılawlaw, sanaat hám eksport kórsetkishlerin támiyinlew, investiciyalıq joybarlardı jedellestiriw, bank sisteması hám qurılıs baǵdarlamalarındaǵı mashqalalardı saplastırıw boyınsha anıq tapsırmalar berildi.