Cırdárya wálayatında reformalardıń nátiyjeliligi hám áhmiyetli wazıypalar kórip shıǵıldı

Sońǵı jıllarda ámelge asırılǵan jańalanıwlar nátiyjesinde wálayat ekonomikasında áhmiyetli strukturalıq ózgerisler júz bergeni atap ótildi. Burın tiykarınan awıl xojalıǵına baylanıslı bolıp qalǵan aymaqta sanaat hám xızmetler tarawı jedel rawajlanıp, biznes ortalıǵı jaqsılandı, aldınǵı isbilermenlerdiń qatlamı qáliplesti.

Ótken jılı Sırdárya wálayatınıń ekonomikası 9,8 procentke ósti. Sanaat óndirisinde 8,2 procentlik ósiw támiyinlenip, bul kórsetkish boyınsha wálayat aymaqlar arasında tórtinshi orındı iyeledi. Xalıqtıń jan basına jalpı aymaqlıq ónimniń kólemi de izbe-iz ósip barmaqta. 2017-jılı 10 million sumdı quraǵan bolsa, 2025-jılǵa kelip 38,1 million sumǵa jetti, yaǵnıy derlik 3,8 esege arttı.

Ótken jılı wálayatta 42 iri investiciyalıq joybar ámelge asırılıp, olardıń ulıwma bahası 333 million dollardan arttı. Bul joybarlar sheńberinde 17,5 mıńnan aslam jańa jumıs orınları jaratıldı.

Májiliste Sırdáryanı Qıtay tájiriybesi tiykarında aldınǵı innovaciyalıq aymaqqa aylandırıw boyınsha ámelge asırılıp atırǵan jumıslarǵa ayrıqsha toqtap ótildi. Qıtay provinciyaları menen tikkeley birge islesiw jolǵa qoyıldı.

Sonday-aq, Koreya Respublikası, Yaponiya hám Malayziyaǵa ámelge asırılǵan xızmet saparları sheńberinde bir qatar investorlar menen sóylesiwler ótkerildi, júzlegen million dollarlıq joybarlar qáliplestirildi. Sonıń ishinde, Gúlistan rayonında 300 million dollarlıq sharwashılıq kompleksi hám balalar ushın azıq-awqat islep shıǵarıw joybarı boyınsha kelisimge erisildi. Yangier qalasında Franciyanıń “Bonduelle” kompaniyası menen birgelikte azıq-awqat ónimlerin islep shıǵarıw joybarın iske qosıw rejelestirilgen.

Sonıń menen birge, sanlı ekonomika, kosmetika sanaatı, agrosanaat hám qayta islew tarawlarında da jańa investiciyalıq baslamalar islep shıǵılmaqta. Atap aytqanda, Shirin qalasında data-oray, Gúlistan qalasında inkubaciya hám akseleraciya orayların shólkemlestiriw boyınsha joybarlar qáliplestirilgen.

Májiliste usı jılı wálayatqa 3 milliard dollar investiciya tartıw hám eksport kólemin 500 million dollarǵa jetkeriw wazıypası qoyıldı. Sonıń esabınan jalpı aymaqlıq ónimdi 9 procentke, sanaattı 8,2 procentke, xızmetler tarawın 15,4 procentke, awıl xojalıǵın 6,8 procentke hám qurılıs kólemin 15 procentke arttırıw rejelestirilgen.

Bántlik hám kámbaǵallıqtı qısqartıw máselelerine de ayrıqsha itibar qaratıldı. Ótken jılı kámbaǵallıq dárejesi 11,3 procentten 6,2 procentke túsirildi. Biraq bul kórsetkish ele de respublikalıq ortasha dárejeden joqarı ekeni atap ótildi.

Usı jılı isbilermenlik joybarların qollap-quwatlaw ushın 10 trillion sum resurs ajıratılmaqta. Bul qarjılar tiykarında 185 mıń xalıqtı jumıs penen támiyinlew, jumıssızlıq dárejesin 4,6 procentke shekem, kámbaǵallıqtı bolsa 3 procentke shekem qısqartıw rejelestirilgen. Gúlistan, Shirin, Yangier qalaları, Sardoba, Sayxunabad, Sırdárya hám Xovos rayonların jumıssızlıq hám kámbaǵallıqtan jıraq aymaqqa aylandırıw ilajları kóriledi.

Bul baǵdarda “Miynet súygish hayal”, “Teń imkaniyat – inklyuziv bántlik”, “Bir máhálle – bir ónim” sıyaqlı baǵdarlamalar sheńberinde isbilermenlikti qollap-quwatlaw, máhállelerde jańa jumıs orınların jaratıw hám xalıqtıń dáramat dereklerin kóbeytiw zárúr ekenligi kórsetip ótildi.

Sociallıq infrastrukturanı rawajlandırıw máseleleri de dodalandı. Jóneltirilgen 100 million dollar esabınan wálayatta 47 mektep, 45 baqsha, 35 medicina mákemesi jáne 18 sport hám mádeniyat obektin tolıq ońlaw tapsırıldı.

Ótken jılı Gúlistan qalasındaǵı 22 mıń shańaraqtı úzliksiz ishimlik suwı menen támiyinlew máselesi sheshildi. Mirzaobod, Sardoba, Boyovut, Xavos rayonları hám Yangier qalasındaǵı 12 mıń shańaraq ta turaqlı ishimlik suwı menen támiyinlenbekte.

Injenerlik infrastrukturasın rawajlandırıw sheńberinde usı jılı 349 kilometr elektr tarmaqların qurıw, 99 transformator ornatıw, sonday-aq, suw tarmaqların keńeytiw esabınan xalıqtı ishimlik suwı menen támiyinlew dárejesin 89,5 procentke jetkeriw rejelestirilgen.

Sonday-aq, wálayatta turaq jay qurılısı jedel dawam ettirilmekte. 2026-jılı 3,5 mıń kvartiradan ibarat 80 kóp qabatlı turaq jay qurıw, sonıń ishinde, 1,5 mıń kvartiranı “Jańa Ózbekstan” massivlerinde qurıw jáne renovaciya baǵdarlaması tiykarında jańa turaq jaylardı qurıw rejelestirilgen.

Awıl xojalıǵındaǵı imkaniyatlardan nátiyjeli paydalanıw zárúr ekenligi ayrıqsha atap ótildi. Sırdáryada egislik maydanları jan basına salıstırǵanda biraz kóp bolıp, suw támiynatı da jaqsı. Biraq miywe-ovoщ eksportı házirshe 60 million dollardan aspay atırǵanı atap ótildi.

Bul baǵdarda “Sirdaryo agro invest” kompaniyasın shólkemlestirip, Xavos rayonında suwdı únemleytuǵın hám joqarı agrotexnologiyalar tiykarında dáramatlı egislik maydanların qáliplestiriw jáne olardı “tayar biznes” túrinde xalıqqa usınıw rejelestirilgen. Dáslep 12 mıń gektar jer maydanında usı mexanizmdi engiziw názerde tutılǵan.

Usı jılı 20,8 mıń gektar jer maydanında suw támiynatın jaqsılaw hám 748 million kub metr suwdı únemlew wazıypası qoyıldı.

Májiliste Vengriya tájiriybesi tiykarında Xavos rayonındaǵı bir qatar máhállelerde “aqıllı awıl” pilot joybarın ámelge asırıw máselesi de kórip shıǵıldı. Onda máhállelerge ajıratılıp atırǵan qarjılardıń ashıq-aydınlıǵı, qáwipsizlik, ekologiyalıq jaǵday, járdemge mútáj shańaraqlardı qollap-quwatlaw hám isbilermenlik imkaniyatları haqqındaǵı maǵlıwmatlar ashıq sanlı sistema arqalı xalıqqa jetkerip beriledi.

Májilis juwmaǵında juwapkerlerge bir qatar anıq tapsırmalar berildi. Sonıń ishinde, Gúlistan qalasındaǵı “Sırdárya” erkin ekonomikalıq zonasında keminde 5 mıń jumıs ornına iye investiciyalıq joybarlardı jaylastırıw, quyash panellerin islep shıǵarıw boyınsha 100 million dollarlıq joybardı iske qosıw, “Feruz” podstanciyasınıń transformatorların modernizaciyalaw wazıypaları belgilendi.

Sonday-aq, Boyovut rayonında “Sultonhovuz” suw saqlaǵıshınıń qurılısı boyınsha texnikalıq-ekonomikalıq tiykar islep shıǵıw, wálayat jolların ońlaw ushın xalıqaralıq finans institutlarınıń qarjıların tartıw, Mirzaobod rayonında ánardı saqlaw hám qayta islew agrokompleksin shólkemlestiriw jáne zamanagóy nálshilik orayların ashıw boyınsha tapsırmalar berildi.

Prezidentimiz jaslardı zamanagóy kásip hám tillerge oqıtıwǵa da ayrıqsha itibar qaratıp, xalıqaralıq standartlar tiykarında mamanlıqtı bahalaw orayların shólkemlestiriw hám keminde 2 mıń jastı kásip-ónerge tayarlaw zárúr ekenligin atap ótti.

Mámleketimiz basshısı wálayatta ámelge asırılıp atırǵan hár bir joybar xalıqtıń dáramatı hám turmıs dárejesinde óziniń ámeliy kórinisin tabıwı kerek ekenligin atap ótip, belgilengen wazıypalardıń óz waqtında hám sapalı orınlanıwın támiyinlew boyınsha kórsetpeler berdi.