Xorezm wálayatında reformalardıń nátiyjeliligi hám tiykarǵı wazıypalar kórip shıǵıldı

Atap ótilgenindey, sońǵı jılları wálayatta bar imkaniyatlardan aqılǵa uǵras paydalanıw arqalı kóplegen tarawlarda unamlı nátiyjelerge erisildi. Sanaat kólemi 2016-jıldaǵı 2,8 trillion sumnan 34,3 trillion sumǵa jetti, jalpı aymaqlıq ónim 63 trillion sumdı quradı. Ótken jılı wálayatqa 1 milliard dollardan aslam investiciya tartıldı.

Sonıń menen birge, erisilgen kórsetkishler aymaqtıń potencialına tolıq sáykes emes ekenligi atap ótildi. Ásirese, turizm tarawında siyrek ushırasatuǵın tariyxıy hám mádeniy miyrasqa iye bolǵan aymaqta turistlerdiń ortasha qalıw múddeti 1-2 kún menen sheklenbekte.

Wálayatta 1 millionnan aslam jaslar jasaydı, hár jılı 35 mıń jas miynet bazarına kirip keledi. Olardıń tálim-tárbiyası, zamanagóy kásip-óner iyelewi hám bántligin támiyinlew aymaq basshısınıń turaqlı itibarında bolıwı zárúr ekenligi kórsetip ótildi. Jas áwladtı Jalaliddin Manguberdi, Beruniy, Xorezmiy hám Zamaxshariy sıyaqlı ullı tulǵalarǵa múnásip etip tárbiyalaw boyınsha jańa sistemalı qatnaslardı islep shıǵıw wazıypası qoyıldı.

Xalıqtıń 67 procenti awıllarda jasaytuǵının esapqa alıp, áyne awıllıq jerlerde qosımsha dáramat dereklerin jaratıw arqalı jumıssızlıq hám kámbaǵallıqtı qısqartıw áhmiyetli ekeni atap ótildi.

Máselen, Gúrlen, Topıraqqala, Yangibazar hám Qwshkwpir rayonlarında sharwashılıqqa qánigelesken 135 máhállede násilli sharwanı kóbeytiw, Úrgensh, Xanqa, Qwshkwpir hám Shavat rayonlarında máhállelerdi qurılıs materialları, toqımashılıq, ónermentshilik hám mebel qurılısı baǵdarlarına qánigelestiriw, sonday-aq, Úrgensh, Qwshkwpir, Xanqa, Yangiariq hám Shavat rayonlarında 6 sanaat hám xızmetler mikroorayın shólkemlestiriw arqalı keminde 10 mıń xalıqtı kámbaǵallıqtan shıǵarıw imkaniyatı bar.

Ótken jılı wálayatqa kelgen sırt elli hám jergilikli turistlerdiń sanı 12,5 millionǵa jetken. Biraq xızmetlerdiń kólemi hám sapası, jańa turistlik marshrutlardı ashıw, sayaxat obektlerin mazmunı jaǵınan bayıtıw jumısları jeterli emesligi atap ótildi.

Xiywa qalası, Baǵat hám Xiywa rayonlarındaǵı turizm máhállelerinde servis obektlerin qurıw, 59 máhálledegi 14 ǵalabalı kóshe boyınsha master-reje islep shıǵıp, isbilermenlerge usınıw wazıypası qoyıldı.
10,8 gektar maydanda jaylasqan Sulayman qala kompleksin jańa turistlik obekt sıpatında kompleksli rawajlandırıw baǵdarlamasın islep shıǵıw tapsırıldı. Sonday-aq, Úrgensh qalası arqalı ótetuǵın Shavat kanalı boyında turizm hám servis obektleri jáne kewilashar oraylar shólkemlestiriw boyınsha master-reje islep shıǵıladı.

Májiliste investiciya hám eksporttı arttırıw tiykarǵı wazıypa sıpatında atap ótildi. Xazorasp, Úrgensh, Shavat, Topıraqqala hám Úrgensh qalasınıń potencialınan nátiyjeli paydalanıp, iri sanaat joybarların ámelge asırıw zárúr ekenligi atap ótildi.

Pitnak qalasındaǵı avtomobil zavodınıń quwatlılıǵın arttırıw, lokalizaciyalaw dárejesin 62 procentke jetkeriw arqalı tutas mashina qurılısı klasterin qáliplestiriw imkaniyatı bar ekenligi atap ótildi. Sonday-aq, Xazoraspta ximiya, toqımashılıq hám azıq-awqat, Shavatta mebel qurılısı hám tekstil baǵdarlarında jańa joybarlardıń ámelge asırılatuǵını belgilendi.

Wálayattıń qala hám rayonların zamanagóy kóriniske keltiriw, jol hám suw infrastrukturasın jaqsılawǵa 1 milliard 600 million dollar ajıratılatuǵını málim etildi.
Ulıwma, usı jılı sırt el investiciyasınıń kólemin 2 milliard dollardan, eksporttı 510 million dollardan arttırıw wazıypası qoyıldı. Bul arqalı jalpı aymaqlıq ónimdi 8,4 procentke, sanaattı 9 procentke, xızmetlerdi 16,2 procentke, awıl xojalıǵın 5,7 procentke arttırıw názerde tutılǵan.

Ótken jılı Xorezm wálayatında kámbaǵallıq dárejesi 11,9 procentten 6,7 procentke túskeni respublikadaǵı eń joqarı nátiyje boldı. Biraq kámbaǵallıq dárejesi respublikadaǵı ortasha dárejeden joqarı bolıp qalıp atırǵanı atap ótildi. Sonlıqtan, jıldıń aqırına shekem jumıssızlıq hám kámbaǵallıq dárejesin keminde 3 procentke shekem qısqartıw tiykarǵı wazıypa sıpatında belgilendi.
Sonnan Xazorasp, Xanqa, Shavat, Yangiariq, Yangibazar, Topıraqqala, Xiywa hám Úrgensh qalaların jumıssızlıq hám kámbaǵallıqtan jıraq aymaqqa aylandırıw tapsırıldı.

Májilis juwmaǵında juwapkerlerge bir qatar anıq wazıypalar júklendi.
Atap aytqanda, Gúrlen rayonındaǵı 158 kilometr kanaldı rekonstrukciyalaw, isbilermenlik joybarları ushın 81 million dollar ajıratıw, 270 nasos agregatın energiyanı únemleytuǵın úskenelerge almastırıw, Ózbekstan – Túrkmenstan shegaraaldı sawda zonasınıń jumısın qarjılandırıw, sociallıq obektler hám infrastrukturanı ońlawǵa 100 milliard sum qaratıw boyınsha tapsırmalar berildi.

Prezidentimiz juwapker adamlardıń aldına jumıslardı xalıqtıń turmısına anıq ózgeris alıp keletuǵın, nátiyjelilikke qaratılǵan etip shólkemlestiriw, hár bir rayon hám máhállede mánzilli qatnastı támiyinlew wazıypasın qoydı.