Nogironligi bo‘lgan 18 yoshgacha bolalar hamda parvarishlash nafaqasi elektron ma’lumotlar asosida “proaktiv shakl”da tayinlanadi.

Bu qanday amalga oshiriladi?

Birinchi bosqichda fuqaroga nogironlik belgilanganidan yoki OIV aniqlanganidan so‘ng Kambag‘allikni qisqartirish va bandlik vazirligi hamda Sog‘liqni saqlash vazirligi nogironligi bo‘lgan 18 yoshgacha bola va (yoki) uning qonuniy vakili to‘g‘risidagi ma’lumotlarni Pensiya jamg‘armasining “Pensiya” axborot tizimiga yuboradi.

Ikkinchi bosqichda, Pensiya jamg‘armasi bo‘limi qonuniy vakilni nogironligi bo‘lgan 18 yoshgacha bola bilan qarindoshlik munosabatlarini o‘rganish uchun Adliya vazirligiga hamda vasiysi yoki homiysi ekanligini o‘rganish uchun Maktabgacha va maktab ta’limi vazirligiga so‘rovlar yuboradi.

Uchinchi bosqichda, Adliya vazirligi va Maktabgacha va maktab ta’limi vazirligi qonuniy vakil to‘g‘risidagi ma’lumotlarni Pensiya jamg‘armasi bo‘limiga yuboradi.

To‘rtinchi bosqichda, Pensiya jamg‘armasi bo‘limi:

- kelib tushgan ma’lumotlar asosida nafaqa tayinlash yoki rad etish to‘g‘risida qaror qabul qiladi;

- nafaqa tayinlangan taqdirda murojaat qiluvchiga nafaqa tayinlangan muddat, nafaqa miqdori, nafaqani qachon va qaerdan olish to‘g‘risida SMS-xabar yuboradi;

- nafaqa tayinlash rad etilgan taqdirda rad etish sabablari to‘g‘risida murojaat qiluvchiga SMS-xabar yuboradi.

Nafaqa tayinlashda Pensiya jamg‘armasi xodimlari ishtirok etmaydi. Barcha jarayonlar avtomatik tarzda amalga oshiriladi va nafaqa tayinlash uchun 30-40 soniya vaqt sarflanadi.