So‘nggi paytlarda ijtimoiy tarmoqlarda respublikamiz hududida, xususan, Farg‘ona va Surxondaryo viloyatlarida asalari oilalarining ko‘plab nobud bo‘layotganligi ko‘rsatilgan turli xabarlar tarqalmoqda.

Qo‘mita tomonidan, mazkur holatga aniqlik kiritish maqsadida, Respublika hayvonlar kasalliklari tashxisi va oziq-ovqat mahsulotlari xavfsizligi davlat markazi va uning Farg‘ona hamda Surxondaryo viloyatlari hududiy markazlari mutaxassislari tomonidan joylarda zararlangan asalarilardan namunalar olinib, veterinariya laboratoriyalarida diagnostik tekshiruvlar o‘tkazildi.

Tekshiruv natijalariga ko‘ra, asalari oilalarining nobud bo‘lishi yuqumli kasalliklar natijasida emasligi, yaʼni asalari oilalari orasida yuqumli kasalliklar tarqalmaganligi tasdiqlandi. Bugungi kunda epizootik barqarorlikka erishilgan.

Olingan xulosalar shuni ko‘rsatmoqdaki, Farg‘ona va Surxondaryo viloyatlarida asalari oilalarining ko‘plab nobud bo‘lishiga paxta dalalariga sepilayotgan kimyoviy pereparatlar sabab bo‘lishi mumkin.

O‘rganish davomida hech qanday virusli yoki bakteriologik kasalliklar bo‘lmaganligi va ko‘p yillardan beri mazkur viloyatlarda asalari kasalliklari kuzatilmaganligi aniqlandi.