Amaliyotda veterinariya dori vositalari va ularni ishlatish tartibi xususida ko‘pchilikda turli savol va muammolar yuzaga keladi. Qo‘mita bo'lim boshlig'i Sabitjan To'laganov hamyurtlarimizdan kelgan ana shunday savollarga javob va tushuntirishlar berdi.
2025-12-17 14:30:00 / Yangiliklar
— Veterenariya amaliyotida hayvonlarni davolashda qo‘llaniladigan dori vositalarini tayinlash yoki berish tartibi qanday?
— “Veterinariya to‘g‘risida” gi qonun hamda Vazirlar Mahkamasining 2023-yil 10-apreldagi 148-sonli qarorining 2-ilovasi bilan tasdiqlangan “Mahalliy va import qilinadigan veterinariya dori vositalari hamda ozuqabop qo‘shimchalar ro‘yxatdan o‘tkazilganligi haqidagi guvohnomani berish to‘g‘risida” gi nizomga muvofiq veterinariya dori vositalari va ozuqabop qo‘shimchalarni ishlab chiqarish, realizatsiya qilish, ulardan foydalanish hamda ularni O‘zbekiston respublikasiga olib kirish faqat davlat veterinariya xizmati tomonidan davlat ro‘yxatidan o‘tkazilganidan keyin amalga oshirilishi belgilangan.
Yuqorida keltirilgan nizomga muvofiq veterinariya dori vositalari va ozuqabop qo‘shimchalar davlat ro‘yxatidan o‘tkazilib, dori vositalari reyestriga kiritiladi.
Davlat ro‘yxatiga olingan veterinariya dori vositalari va ozuqabop qo‘shimchalarning elektron reyestri bilan https://nefrit.vetgov.uz/reestr xavolasi orqali tanishish imkoniyati mavjud.
— Vetaptekalar faoliyati litsenziyalanadimi? Ularning batafsil ro‘yxati bilan qayerda tanishish mumkin?
— Vazirlar Mahkamasining 2022-yil 21-fevraldagi 80-sonli qarori bilan tadiqlangan “Maxsus elektron tizim orqali ayrim faoliyat turlarini litsenziyalash tartibi to‘g‘risidagi yagona nizom” ga muvofiq veterinariya dori vositalari va ozuqabop qo‘shimchalarning realizatsiya qilish tegishli litsenziya asosida amalga oshiriladi.
Litsenziyalar reyestri “Litsenziya” AT da elektron shaklda faoliyatning har bir litsenziyalanadigan turi bo‘yicha alohida yuritiladi va undagi ma’lumot barcha uchun ochiq hisoblanadi.
Veterinariya faoliyati uchun tegishli litsenziyaga ega tashkilotlar to‘g‘risidagi ma’lumotlar bilan https://license.gov.uz/registry havolasi orqali tanishish imkoniyati mavjud.
Davlat ro‘yxatiga olingan veterinariya dori vositalari va ozuqabop qo‘shimchalari yuzasidan Veterinariya dori vositalari va mahsulotlarni sinovdan o‘tkazish davlat ilmiy nazorat markazining +998 77 420-61-96 tel raqamlari orqali ma’lumot olish mumkin.
Veterinariya dori vositalari va ozuqabop qo‘shimchalarning realizatsiya faoliyatini litsenziyalash yuzasidan Veterinariya va chorvachilikni rivojlantirish qo‘mitasining +998 71 202 12 00 (ichki 330, 244) telefon raqamlari orqali ma’lumot olish mumkin.
Shuningdek, zarur hollarda hayvonlarni davolash-profilaktika maqsadlarida retsept yozish xududiy veterinariya mutaxasislari tomonidan amalga oshiriladi.