O'zbekiston Respublikasi suv xo'jaligi vazirligi huzuridagi Suv xo'jaligi obyektlarini ekspluatatsiya qilish agentligi

Tadbir suv resurslarini samarali boshqarish, aholini sifatli ichimlik suvi bilan ta’minlash, sanitariya xizmatlarini takomillashtirish hamda sohada xalqaro hamkorlikni yanada mustahkamlash masalalariga bag‘ishlandi.

Yig‘ilishda O‘zbekiston Respublikasi Suv xo‘jaligi vazirligi, Qurilish va uy-joy kommunal xo‘jaligi vazirligi, «O‘zsuvta’minot» aksiyadorlik jamiyati, Shveysariyaning O‘zbekistondagi elchixonasi, shuningdek, xalqaro moliya institutlari va rivojlanish hamkorlari vakillari ishtirok etdi.

Tadbirni Suv xo‘jaligi vazirining birinchi o‘rinbosari, Tarmoqlararo ishchi guruhi hamraisi Zokir Ishpo‘latov, Qurilish va uy-joy kommunal xo‘jaligi vaziri o‘rinbosari Ozoda Jo‘rayeva, «O‘zsuvta’minot» AJ boshqaruvi raisi o‘rinbosari Nodir Xodjamov hamda Shveysariyaning O‘zbekistondagi elchixonasi missiya rahbari o‘rinbosari, Hamkorlik bo‘limi rahbari Andrin Fink kirish so‘zlari bilan ochdi.

— Mamlakatimizda suv resurslarini samarali boshqarish, aholini sifatli ichimlik suvi bilan ta’minlash, oqova suv xizmatlarini takomillashtirish va suvdan oqilona foydalanish davlat siyosatining ustuvor yo‘nalishlaridan hisoblanadi. Iqlim o‘zgarishi, suvga bo‘lgan talabning ortishi sohadagi islohotlarni izchil davom ettirish, zamonaviy yondashuvlarni joriy etish va barcha manfaatdor tomonlarning sa’y-harakatlarini birlashtirishni taqozo etmoqda. Shu jihatdan Tarmoqlararo ishchi guruhi davlat organlari, xalqaro moliya institutlari va rivojlanish hamkorlari o‘rtasidagi muloqotni mustahkamlash, ustuvor vazifalarni muvofiqlashtirish va amaliy hamkorlikni kengaytirishda muhim platforma bo‘lib xizmat qilmoqda, — dedi Zokir Ishpo‘latov.

Yig‘ilish davomida suv sohasini rivojlantirishga qaratilgan muhim tashabbuslar va strategik hujjatlar muhokama qilindi.

Jumladan, 2026-yilgi Suvni tejash bo‘yicha xalqaro forumga tayyorgarlik ko‘rish, uni yuqori saviyada tashkil etish yuzasidan navbatdagi chora-tadbirlar ko‘rib chiqildi.

Shuningdek, 2030-yilgacha ichimlik suvi ta’minoti va oqova suv xizmatlarini takomillashtirish strategiyasi loyihasi taqdim etildi. Uning asosiy yo‘nalishlari va sohani uzoq muddatli rivojlantirishga doir vazifalar muhokama qilindi.

Kun tartibidan JTI tashabbusi doirasida O‘zbekistonda amalga oshirilayotgan suv ta’minoti, sanitariya va gigiyena sohasidagi loyihaning so‘nggi uch yillik faoliyati, erishilgan natijalar va kelgusidagi vazifalar ham o‘rin oldi.

Tadbir doirasida Tarmoqlararo ishchi guruhining rivojlanish hamkorlari tomonidan amalga oshiriladigan hamraislik vazifasini Shveysariya taraqqiyot va hamkorlik agentligidan Osiyo taraqqiyot bankiga rasman topshirish marosimi o‘tkazildi.

Ushbu jarayon milliy tashkilotlar va xalqaro rivojlanish hamkorlari o‘rtasidagi o‘zaro muloqot, hamkorlik va faoliyatni muvofiqlashtirish ishlarining izchil davom ettirilishiga xizmat qiladi.

Yig‘ilish yakunida ishtirokchilar kun tartibidagi masalalar yuzasidan fikr almashib, o‘zaro hamkorlikni yanada rivojlantirishning ustuvor yo‘nalishlari va navbatdagi amaliy vazifalarni muhokama qildilar.