Mirzacho‘lda 1 200 gektar yerning suv ta’minotini yaxshilaydigan kanal foydalanishga topshirildi
2026-08-26 08:10:00 / Yangiliklar
Mazkur kanal Mirzacho‘l tumanidagi qishloq xo‘jaligi maydonlari bilan birga Qozog‘iston Respublikasining chegaradosh hududlariga suv yetkazib berishda ham muhim ahamiyatga ega. Shu jihatdan obyektning rekonstruksiya qilinishi nafaqat hududdagi suv ta’minotini yaxshilash, balki ikki davlat o‘rtasidagi suv xo‘jaligi sohasidagi amaliy hamkorlikni mustahkamlashga ham xizmat qiladi.
Kanalning foydalanishga topshirilishi munosabati bilan o‘tkazilgan tantanali tadbirda Qozog‘iston Respublikasi Suv xo‘jaligi va irragsiya vazirligining Turkiston viloyati “Kazvodxoz” filiali direktori Merlan Kerimjanov, O‘zbekiston Respublikasi Suv xo‘jaligi vazirligi boshqarma boshlig‘i Jahongir Abdurazzoqov, Sirdaryo–Zarafshon irrigatsiya tizimlari havza boshqarmasi boshlig‘i Muzaffar Turdiboyev, soha tashkilotlari rahbar va xodimlari hamda mahalla faollari ishtirok etdi.
Tadbirda so‘zga chiqqanlar keyingi yillarda suv resurslaridan oqilona foydalanish, irrigatsiya tarmoqlarini yaxshilash va suv yo‘qotishlarini kamaytirishga alohida e’tibor qaratilayotganini ta’kidladilar. Shuningdek, O‘zbekiston va Qozog‘istonning chegaradosh hududlarida suvdan kelishilgan va samarali foydalanish ikki mamlakat manfaatlari uchun muhim ahamiyat kasb etishi qayd etildi.
“K-25-15” kanalining 9,7 kilometr qismi zamonaviy talablar asosida rekonstruksiya qilinishi natijasida suvni iste’molchilarga barqaror yetkazib berish uchun zarur infratuzilma yaratildi. Loyiha “Jizzaxqurilishinvest” davlat muassasasi buyurtmachiligida, “IMKON-LOYIHA” MCHJ tomonidan ishlab chiqilgan loyiha asosida “UchtepamaxsusSUVpudrat” MCHJ tomonidan amalga oshirildi.
Rekonstruksiya ishlari natijasida avval suv ta’minoti bilan bog‘liq qiyinchiliklar mavjud bo‘lgan 800 gektar yer maydonini qayta foydalanishga kiritish, shuningdek, yana 400 gektar maydonning suv ta’minotini yaxshilash imkoniyati yaratildi.
Natijada 1 ming 200 gektar yer maydonining suv ta’minoti yaxshilanib, qishloq xo‘jaligi ekinlarini barqaror sug‘orish, yerlardan samarali foydalanish va suv yetkazib berishdagi yo‘qotishlarni kamaytirish uchun qo‘shimcha imkoniyat yaratildi.
Tantanali marosimda ramziy lenta kesilib, rekonstruksiya qilingan kanal foydalanishga topshirildi. Tadbir ishtirokchilari kanal orqali suv yetkazib berish jarayonini ko‘zdan kechirdi.
Marosim yakunida nuroniylar yurtimiz tinchligi, xalqimiz farovonligi, O‘zbekiston va Qozog‘iston o‘rtasidagi do‘stlik va hamkorlikning yanada mustahkamlanishi, Mirzacho‘l dalalarining serhosil bo‘lishini tilab duo qildi.